Sun.Star Breaking News

ni Mel Coronel

NAGBUTYAG si Dionesia, inahan ni Manny Pacquiao, nga wa siya malisang sa istoryang migawas karon nga dunay grupo nga buot modagit kaniya ug sa ubang miyembro sa iyang pamilya.

Matud ni Dionesia, dihang nahinabi kini sa RMN Radyo Gensan ug Superbalita, nga kaniadto pa ang taho nga iyang nadawat human sa sunod-sunod nga kalampusan sa iyang anak sa dulang boksing apan iyang gipanghinaot nga dili ipadayon sa grupo ang dautang tumong tungod kay wala man gihapon silay makuhang kwarta.

“Kaniadto pa ang maong balita. Mao gani nga gisultihan pud ko sa akong bodyguard nga naa lagi daw nadawat nga text ang among pamilya nga kuno dunay modagit kanako ug sa akong pamilya. Pero sus oi unsa may makuha nila sa akoa nga wala man koy kwarta, nagaagad lang man ko sa gihatag sa akong anak nga si Manny matag buwan,” matud ni Dionesia.

Unang migawas ang taho gikan sa pamilyang Pacquiao nga sila nakadawat og text message gikan sa lahi nga grupo nga nagpahimangno nga magbantay tungod kay dunay laing pundok nga gikan sa Manila nga nagtinguha nga modagit sa bisan kinsang sakop sa pamilya aron ipalukat.

“Sa ako lang ipaabot sa grupo nga nagplano sa akoa nga ila na lang kung patyon kay wala man gihapon silay makuha sa akoa. Unsa man ang ilang makuha, usa pa dili man sab kaya sa akong anak nga ihatag na lang sab tanan sa tawo. Ang iyang hago kay unsa na lang ang among kaonon, nagtuo ko nga anaa gihapon koy magbalantay si Mama Mary nga kanunay’ng nag-uban kanako apan dili lang gyud mi mokompiyansa,” dugang sa inahan ni Manny.

Nakaabot na sab kang Pacman didto sa Amerika ang taho hinungdan nga iyang gitahasan na ang iyang mga security personal nga nabilin karon sa dakbayan sa General Santos nga ilang doblehon pa ang pagbantay sa iyang pamilya aron dili makahigayon ang dautang grupo.

Duna nay grupo sa kapulisan nga gitahasan karon aron magmonitor sa mga lakaw sa pamilyang Pacquiao dinhi sa siyudad. (Sun.Star Superbalita General Santos)

Bisaya