Sun.Star Breaking News

ni Mel Coronel

TULO ka mga bata gipangdala sa balay tambalanan human nangahilo sa ilang gikaong bunga sa tuba-tuba sa Barangay San Jose ning dakbayan sa General Santos, alas 5 sa hapon, Sabado.

Nadala ang mga biktima sa ospital ug nailhan nga sila si alyas Maria Theresa, 3; Benjor, 4; ug usa ka alyas Janet, 5; (apelyido gitago kay menor) ug pulos magsilingan sa Barangay San Jose.

Si Mercy, inahan ni Janet, nagbutyag nga iyang gibilin ang iyang anak sa ilang panimalay kay namasura sila sa dumping site sa Barangay Bawing.

Apan sa iyang pagpauli sa ilang panimalay alas 5 sa hapon mao na lang ang iyang nasayran nga nagpunay na og suka ang bata.

“Natingala ko kay pag-abot ko gikan sa among pagpanguha og basura, nagduda ko nga nagsigi naman og hilak ug suka ang akong anak. Akong gipangutana wala pa siya motug-an apan sa kadugayon didto na mitug-an nga nangaon diay sila og bunga sa tuba-tuba nga diha sa kiliran sa among pinuy-anan,” matud ni Mercy.

Samtang si Marietah, inahan ni Maria Theresa, nagbutyag nga iyang gibilin ang iyang anak sa silingan aron makapangita og panginabuhian apan wala siya magdahum nga mikaon ang anak og liso sa tuba-tuba. Sumala kaniya nga daan na sila nasayod nga makahilo gyud ang bunga sa tuba-tuba.

“Nagsuka-suka ang akong anak, nangutana ko unsa ang imong gikaon, wala motug-an sa akoa. Apan sa kadugayan didto na nagtug-an ang akong anak nga nangaon silang tulo uban sa akong silingan og bunga sa tuba-tuba,” sigon sa laing inahan sa batang nakakaon og bunga sa tuba-tuba.

Gipanghimakak sab sa ikatulong inahan nga si Alicia nga kagutom ang nagtukmod aron mangaon og bunga sa tuba-tuba ang iyang anak nga si Benjur.

Matud sa inahan nga una siya mibiya sa ilang panimalay iya pang gibinlan og pagkaon ang iyang anak.

Gipangdala ang mga bata sa General Santos City Hospital ug kasamtangan pa nga giatiman sa mga mananambal sulod sa room 402. (Sun.Star Superbalita General Santos)

Bisaya