General Santos: Bag-ong natawo gilabay, naluwas (2:29 p.m.)
ni Mel Coronel
USA ka batang babaye nga bag-ong gihimugso ang nakaplagan sa usa ka creek sa Barangay Fatima ning dakbayan sa General Santos, alas 11 sa udto, Lunes.
Si Annie Sanza, hamtong ang panuigon, molupyo sa Zone 10-B sa maong barangay, nagbutyag nga mosugat unta siya sa anak sa iyang bayaw padulong sa tunghaan sa dihang iyang nakit-an nga dunay mga bata ang nagtapok sa daplin sa creek hinungdan nga iya kining giduol.
Apan nahikurat sa dihang nakaplagan ang usa ka cellophane nga dunay sulod nga batang babaye.
“Nakit-an nako nga nanglagum na ang bata sa sulod sa cellophane hinungdan nga ako kining gidali pagdala padulong ngadto sa Well Family Midwife Clinic aron matabang pa ug gipadala dayon sa ospital,” matud ni Sanza.
Gituohan ang batang babaye nga bag-o pang gilabay tungod kay nakit-an ang lawas nga naputos pa og dugo.
“Maayo na lang kay nadali pa namo sa ospital. Ingon sa mga mananambal kung wala pa kini madali, posibleng mamatay ang bata kay lagum na kaayo siya. Kung ako lang ang pasultihon ani buot gyud sa inahan nga patyon ang bata kay sa creek man siya gilabay,” dugang ni Sanza.
Si Vicky Magante, labaw sa City Social Welfare Development Office ning dakbayan, nagbutyag nga nagpadayon ang ilang gihimong imbestigasyon sa lugar diin gilabay ang bata aron masayran kinsa ang naglabay sa bag-ong gihimugsong bata.
“Amo na kanang ginasuta sa lugar, apan dili pa ko makasulti kung ang nakakita nga si Annie maoy mosagop sa bata kay amo pa kanang ipailalom sa evaluation kung kaya na niya nga mobuhi sa bata kay duna sab siyay tulo ka mga anak. Ang akong panawagan sa mga nanay nga kung sila mamabdos unta dili nila buhaton ang paglabay sa ilang mga anak sa creek o asang lugar kay luoy kaayo ang mga bata human nilang gipanganak ila dayong patyon, daghan man gani ang walay mga anak,” matud ni Magante.
Anaa pa sulod sa General Santos City Hospital ang bata ug human kini nadapatan og tambal maayo na ang iyang kahimtang. Dad-on sab kini sa buhatan sa CSWDO samtang giatiman pa ang mga papeles alang sa mosagop niini. (Sun.Star Superbalita General Santos)
Leave a Reply