General Santos: Bata gilabay sa sapa, patay (2:38 p.m.)
ni Mel Coronel
BAG-ONG gihimugso nga batang babaye ang nakit-ang patay nga naglutaw-lutaw sa sapa sa Barangay Batolemong ning dakbayan sa General Santos, alas 9 sa buntag, Dominggo.
Ang lawas sa bata giputos pa og usa ka puting lampin ug nagdikit pa ang pusod sa iyang tiyan nga nakit-an sa mga tawo sa Purok 7.
Si Remy Dondan, nagpuyo sa lugar, nagsulti nga ilang nakit-an ang lawas sa batang babaye apan dili sila makasulti kung patay na sa dihang gipaanod sa sapa.
Apan daghan ang nagtuo nga posibleng namatay na ang bata atol sa pagpanganak ug gilabay na lang dayon.
Daling gitaho sa mga molupyo ngadto sa kwerpo sa kapulisan ayha kini gikuha sa punerarya ug gidala sa Almeria Funeral Homes aron ipahiluna og tarong ang patay’ng lawas.
Mga sakop sa City Health nag-imbestiga na sa patay’ng lawas aron masayran kung gituyo sa pagpatay pinaagi sa paglabay ngadto sa sapa.
Mga sakop sa City Social Welfare Development Office (CSWDO) nag-imbestiga na sab sa palibot diin nakit-an ang lawas sa biktima aron masuta nila kinsa ang inahan nga kanhing mabdus.
Nagbahad ang mga otoridad nga ilang pasakaan og kaso ang walay puangod nga inahan kung ilang mapamatud-an nga giluyo ang pagpatay sa batang babaye.
Samtang nagpadayon ang panawagan sa CSWDO ngadto sa mga inahan nga kung dili nila kayang buhion ang ilang mga anak modangop kini sa ilang buhatan aron mapangitaan og pamaagi nungka ang paglabay sa ilang mga anak sa sapa.
Kahinumduman nga karong bulana lang duha na ka mga bata ang nangamatay human gipanglabay sa wala pa matumbok nga mga inahan. (Sun.Star Superbalita General Santos)
Leave a Reply