Sun.Star Breaking News

ni Orlando Dinoy

NAGBANGUTAN ang pamilya Lavega nga taga Dolo, Bansalan, Davao del Sur batok sa Bansalan Medical Clinic human namatay ang batang bag-ong gihimugso niadtong Domingo.

Naghilak nga midangop sa Sun.Star Superbalita ang inahan nga si Marissa Lavega dihang matud pa wala dayon siya gi-atiman sa mga nars niadtong higayona nga manganakay na siya.

“Pag-abot namo alas 4 sa kaadlawon, giingan lang ko paglakaw-lakaw sa kay alas 8 pa daw ko manganak,” matud ni Marissa.

“Di ko kadawat nga mamatay lang ang bata kay siyam ka bulan ko nga nag-antos pag-adto sa center para lang ma check-up ko,” dugang niya samtang gatulo ang mga luha nga nagsaysay sa nahitabo kaniya.

Nasayran sa Superbalita nga namatay ang bata paglabay sa tulo ka oras human nahagbong sa semento dihang naka-anak si Marissa samtang nangihi.

Pwerteng sukoa sa apohang si Teresita Sapatan sanglit namalit pa sila og dextrose aron matabang ang bata apan gikataho nga wa kini gidapat sa mga nars nga nag-atiman.

“Grabe pa gyud kay wa pa gani nahinloan ang inahan ug bata, gipaningil nami og 3,500 nga bill,” matud sa apohan.

Tungod niini buot nilang itaho sa kapulisan ang insidente aron ma-imbestigahan.

Si Dr. Edison Martin, medical director sa maong balay-tambalanan, nagtuo nga ‘meconium stain’ ang rason nga namatay ang bata tungod sa pagpanglagum niini.

“Pero katungod man nila nga moreklamo kay nasakitan siguro sila sa nahitabo,” pung ni Martin.

“Anyway nag-conduct na pud mi og investigation sa among employees and we are also open for any investigation by the authorities,” pasalig sa doktor. (Sun.Star Superbalita Davao)

Bisaya