NASUNOG ang tibuok parte sa lawas sa usa ka lalaki human mibuto ang tangke sa blow torch niadtong Lunes mga alas 3:30 sa hapon sa Barangay Basak lungsod sa Opol, Misamis Oriental.

Giila ang biktima nga mao si Jason Sumaliray, 16, sa susamang dapit.

Gidala ang biktima sa Northern Mindanao Medical Center (NMMC) human wala naagwanta sa biktima ang kasakit ug iyang sunog nga lawas.

Matud sa usa sa personahe sa NMMC nga nahinabi sa Sun.Star Superbalita nga niuban sa pag-ihaw og kanding ang biktima kay adunay giselebrar niadtong tungora.

Gigamit ni Sumaliray ang blow torch aron maoy idaob sa balhibo sa kanding apan nakusgan niini pagpalong ang maong blow torch ug kalit lang kining nibuto nga nagdala pa og kalayo hinungdan sa pagkasunog sa tibuok parte sa iyang lawas.

Tungod niini, dali nga gitabang ang biktima sa mismong mga kauban ug gidala kini pagdali sa (NMMC). Ang mga ginikanan sa biktima daw dili makatuo sa nahitabong pagkasunog sa anak.

Nasayran nga nag-itom ug napanit ang parte sa lawas sa 16 anyos kinsa padayon pa nga giatiman sa doktor ning panahona ug giobserbahan.