DUHA ka mga gituohang miyembro sa grupong Batang Mindanao (BM-29) ang giluthang patay kagahapon mga ala 1:00 sa kadlawon sa Montecarlo Arcade, West Bound Terminal, Bulua ning siyudad sa Cagayan de Oro.

Ang duha ka mga wala mailang biktima ang nakaplagan nga nagbuy-od ug naligo sa ilang kaugalingon nga dugo sa vegetable section nga bahin sa maong dapit.

Si SPO1 Rommel Villaro sa Police Station (PS) 7 sa Bulua kinsa usa sa imbestigador sa kaso nihatag og deskripsiyon sa mga biktima diin usa kanila adunay katas-on nga 5'7, nagsul-ob og gray nga t-shirt, pantalon nga kolor blue, adunay kolor brown nga sandal ug anaa sa 30 ngadto 35 anyos ang pangidaron ug walay nakita nga patik sa kalawasan.

Base sa inisyal nga imbestigasyon sa taga Scene of the Crime Operatives (SOCO) walay samad pinusilan nga nakita apan gitouhang gibunalan ang ulo sa biktima.

Samtang ang usa ka biktima nga positibong miyembro sa BM-29 tungod sa patik niini sa wala nga bahin sa sampot ang nakaplagan sa salog sa stall.

Nagsul-ob kini og puti nga t-shirt, kolor maroon nga adunay stripe nga green nga shortpants, brown nga tsinelas, anaa na sa pangidaron nga 20-25 anyos ug adunay katas-on nga 5'1" ug kulot ang buhok.

Dugang patik niini ang "Rotulda" sa dughan nga gituohang apelyido sa biktima.

Nakuha gikan sa bulsa sa biktima ang duha ka metrosan hinungdan nga gituohan kining usa ka panday.

Duha ka samad pinusilan ang naangkon niini sa dalunggan ug ulo nga bahin, diin gituohang gisukmag pa una gipusil tungod sa grabeng bun-og nga naangkon niini sa kalawasan.

Matud ni Villaro ngaÿwala pa nahibaw-in kung kinsa ang mga suspetsado hinungdan nga padayon pa kini nilang gisubay.

Sa taho sa mga stall holder sa maong dapit wala silay nakita nga mga suspetsado atol sa hitabo samtang dili pamilyar kanila ang hitsura sa duha ka biktima labina nga atol sa kagabhion, daghan ang dili mailang mga tawo ang mangatulog sa mga stall.

Apan niadtong higayona adunay nakasulti nga upat ang natulog sa maong dapit ug gikatangad-an nganong nawala ang duha.

Gibutyag ni Villaro nga wala silay nakita nga dautang record sa mga biktima labina padayon pa ang imbestigasyon.

Nigawas ang taho nga posibleng grupo sa mga vigilantes ang niluthang sa BM-29 ug ang usa ka biktima gitabangan lamang og bunal sa wala mailang mga suspetsado.

Sa kasamtangan gidala na ang patayng lawas sa duha sa Bollozos funeral parlor alang sa otopsiya niini.

Ang kapolisan nanawagan nga kung kinsa ang nawad-an og pamilya i claim kini sa maong punerarya aron mailhan ang identity sa duha. 

Ang kapolisan sa PS7 padayon pa sa paghimo og dugang imbestigasyon aron pagtino sa motibo sa pagpatay ug masikop ang mga suspetadong nihimo niini.