HUMAN positibong gitudlo sa duha ka mga testigo ang polis nga nalambigit sa Martinez murder case, gikatakda nga sunod nga mohatag og testimonya ang duha ka mga opisyal sa National Bureau of Investigation (NBI) 10.

Sila si Regional Director Justo Jose Yap ug Dr. Tommy Uy, medico legal sa NBI ang mohatag sa ilang testimonya sa sunod nga trial nga gikatakdang himoon karong Hulyo 16 ug 17 sa Regional Trial Court (RTC) Branch 21 ubos ni Judge Gil Bollozos.

Si Assistant Chief State Prosecutor Richard Anthony Fadullon sa iyang bahin nidumili paghatag og mga pamahayag kalabot sa kinatibuk-ang dagan sa pagdungog sa kaso.

Nidumili usab kini paghatag og mga katin-awan kalabot sa paghatag og testimonya ni Director Yap sa sunod nga pagdungog apan nipadayag nga "you will see after the testimony of Director Yap."

Human sa testimonya nila ni Yap ug Uy, dinhi na usab mahibaw-an kon mahatag kang Manangcawal ang iyang hangyo nga makapiyansa alang sa temporaryo niining kagawasan.

Sa gipahigayon nga marathon hearing niadtong adlawng Lunes ug Martes, makaunom ka higayon nga gitudlo ni Julius Agbalog si PO3 Bangcola Manangcawal nga giingong usa sa nipusil ug nikulata sa `salvage victim' nga si Robert Martinez. Ang laing akusado giila nga si PO2 Rommel Pontillas nga maoy unang nipusil ni Martinez sa wala nga tuhod.

Si Agbalog mao ang security guard sa Cosmopolitan Funeral Homes diin nahitabo ang insidenti. Si Martinez nakita nga patay pagkasunod adlaw sa hilit nga dapit sa barangay Balulang diin ang lawas dunay mga samad pinusilan ingon man mga bun-og.

Sa wala pa nakapagawas og warrant of arrest ang korte, boluntaryong nitahan si Manangcawal samtang si Pontillas nisibat usab hinungdan nga giwala na siya sa listahan sa mga polis tungod sa iyang pag-AWOL kon absent without leave.