2 patay sa bangga

Sunday, February 7, 2010

DUHA ka mga lalaki ang pulos nangakabsan sa kinabuhi human sa aksidente sa dalan sa managlahi nga dapit.

Ang duha ka biktima gidala sa Northern Mindanao Medical Center (NMMC) ning siyudad sa Cagayan de Oro.

Have something to report? Tell us in text, photos or videos.

Niadtong Biyernes mga alas 11:30 sa gabii, dead on arrival nga gideklarar sa mga doktor si Ben Janie Capritso, 18, taga Barangay Mauswagon lungsod sa Laguindingan, Misamis Oriental, human nibangga ang gisakyang motorsiklo niini.

Kritikal ang kondisyon sa driver nga mao si Jupith Cabilan, 20, sa susamang dapit.

Nasayran nga pauli na ang mga biktima sa ilang puloy-anan dihang paghidangat sa Sitio Sinay sa susamang barangay aksidenteng nabangga ang gisakyang motorsiklo sa punoan sa kahoy.

Tungod sa kakusog sa dagan ug sa pagkabangga nilagpot ang mga sakay niini.

Dili mahitsura ang nawong ni Capritso ug nabali ang duha ka tuhod niini hinungdan sa hinanaling kamatayon.

Samtang nabunal sab ang ulo ni Cabilan ug grabe ang naangkon niining bun-og sa nawong.

Gitouhang hubog nga nimaneho ang driver hinungdan sa pagkabangga.

Ang kapolisan sa Laguindingan Police Station maoy nidala sa biktima sa NMMC apan paghidangat gideklarar si Capritso nga patay na samtang nagpabiling giobserbahan ang kahimtang ni Cabilan.

Samtang laing biktima sa aksidente sa dalan mao si Rosendo Butron, 39, minyo ang nakabsan gihapon sa iyang kinabuhi human nagbangga ang gimanehong motorsiklo niini sa laing motorsiklo.

Nahitabo ang insidente niadtong Biyernes alas 11:00 sa gabii sa San Antonio, lungsod sa Jasaan Misamis Oriental.

Kauban sa biktima ang backrider nga mao si Henelito Alvarez, 45, minyo sa susamang dapit kinsa nakaangkon gihapon og ubay-ubay nga bun-og sa kalawasan.

Pauli na ang mga biktima sa puloy-anan dihang natabo ang usa ka motorsiklo hinungdan sa pagkasungag niini.

Sa kakurat ni Butron sa deretsong hitabo nahulog kini sa motorsiklo ug maayong pagkabunal sa ulo.

Naabtan pa ang biktima pipila ka oras sulod sa NMMC apan nakabsan gihapon sa iyang kinabuhi.

Sa pagsulat ning balita nagpabilin pa sa NMMC ang backrider samtang gidala na ang patayng lawas sa driver sa puloy-anan niini.