2 sikop sa buy-bust

Sunday, March 21, 2010

USA ka buy-bust operation ang gipahigayon sa mga sakop sa Philippine Drug Enforcement Agency Northern Mindanao (PDEA-10) hinungdan sa pagkasikop sa duha ka mga lalaki niadtong Sabado mga alas 6:30 sa gabii sa Zone 05, Barangay 26 ning siyudad sa Cagayan de Oro.

Duha ka mga lalaki kinsa anaa sa watchlist sa maong buhatan ang nasikop nga mao sila si Edwin Masiba, 37, minyo, ug Guillermo Sagaad, 36, minyo, sa susamang dapit.

Have something to report? Tell us in text, photos or videos.

Si Juliet Caga-anan information officer sa PDEA nibutyag sa Sun.Star Superbalita nga nakuha gikan sa kamot ni Masiba ang usa ka gamayng pakete sa white crystalline nga gituohang shabu nga gibaligya niini sa usa ka PDEA agent isip poseur buyer.

Samtang si Sagaad niadtong tungora giingong nasapon nga nagsimhot sa ilegal nga druga.

Nakumpiska sa lugar ang pipila ka mga paraphernalia uban sa upat ka improvised aluminum foil tooters, napulo ka mga aluminum foil strips, tulo ka disposable lighter ug lima ka gituohang shabu risidue.

Gibalhog sa prisuhan sa PDEA-10 ang duha ka mga mga suspek diin giandam na ang kasong posibleng ipasaka batok kanila supak sa balaod RA 9165 Comprehensive Dangerous Drugs Act of 2002.

Ang mga butang nga nakumpiska dalahon sa Philippine National Police Crime Laboraratory alang sa masusing eksamin.

Samtang atol sa pagpangronda, duha ka mga minor ang nireklamo sa Police Station 3 (PS3) sa Agora human giingong gisagpa sa gitouhang mga PDEA agent.

Gibati og kasakit sa ilang mga nawong ang duha ka biktima hinungdan nga midangop sa kapolisan ug nagpatabang. Hinuon kini nga kaso gisunod na sa kapolisan sa PS3.