PADAYON pa nga gisuta sa kapolisan ang kamatayon sa 24 anyos kinsa nakaplagan nga wala nay kinabuhi niadtong Domingo mga alas 9:30 sa buntag sa Upper Ramonal, Camaman-an ning siyudad sa Cagayan de Oro.
Giila ang biktima nga mao si Ronnie C. Ilango, 24, ulitawo, residente sa susamang dapit.
Wala mitubag dihang gitawagan sa iyang iyaan ang biktima hinungdan nga gisusi ang lawak ug napalgan nga naghikot og pisi sa iyang liog ang biktima.
Nakalingkod ang sampot niini sa kawayan nga salog samtang adunay hikot ang liog sa biktima nga gihikot sa marko sa dingding.
Apan gikatingala pag ayo sa iyaan sa biktima nganong napuno sa kinawrasan ang liog ug pangos sa lawas mao nga dako ang pagtuo niini nga adunay foulplay sa kamatayon.
Hinuon ang iyaan ug mga silingan nibutyag nga wala sila masayod kung aduna bay kaaway ang biktima labina ilado kini nga boutan. Gani naginabuhi kini isip sikad driver ug mag-sideline usab sa pagpanghakot og kahoy.
Si PO3 Rabbi Pancit sa Police Station 2 (PS2) sa Cogon nibutyag sa pakighinabi sa Sun.Star Superbalita nga gisuta pa ning panahona sa Scene of the Crime Operatives kung tinuod ba nga naghikog ang biktima labina dili kaayo sila kombinsido sa hitsura niini dihang nakaplagan.
Ang patayng lawas anaa karon sa Bollozos funeral parlor.