3 basurero kritikal

Monday, March 1, 2010

PULOS kritikal ang kondisyon sa tulo ka mga garbage collector human nayabo ang gisakyang garbage truck sa Brgy. San Juan, siyudad sa Gingoog, Misamis Oriental.

Giduso sa Northern Mindanao Medical Center ning siyudad sa Cagayan de Oro ang mga biktima nga mao sila si Kennen Granada, 21, Nicolas Agot, 27 ug Ronald Alab, 28, mga molupyo sa susamang siyudad.

Have something to report? Tell us in text, photos or videos.

Si Catalina, usa sa paryente sa mga biktima nga nahinabi sa Sun.Star Superbalita nisaysay nga nahitabo ang insidente niadtong Domingo mga alas 7:00 sa gabii dihang pauli na ang gisakyan nga garbage truck sa siyudad.

Nasayran nga nibuto ang brake sa maong garbage truck nga gimaneho ni Agot hinungdan nga milahos sa pangpang ug maayong pagkayabo niini.

Maayo na lamang nga walay balay sa daplin nga bahin atol sa insidente.

Matud ni Catalina nga dili tiaw ang kadaut nga naangkon sa mga biktima human duha kanila naipit ang usa ug milagpot human wala makabantay.

Si Granada ang nagrabehan tungod kay nabangga ang dughan niini mao nga naglisod sa pagginhawa samtang si Agot samaran ang ulo ug grabeng bun-og sa lawas ug ubay-ubay usab nga samad sa kalawasan ang naangkon ni Alab.

Hinuon walay mabasol sa hitabo labina nga aksidente lamang ang hitabo. (Stephanie V. Berganio)