DEAD on arrival ang usa ka tinun-an samtang angol ang usa human nabanggan sa dyip sa Barangay Bugo ning siyudad sa Cagayan de Oro.

Giila ang namatay nga mao si Jhon Lloyd Lopian, ug naangol ang kauban niining si Adrian Vencio, 9, pulos nagpuyo sa Puerto ning siyudad ug mga tinun-an sa Bugo Elementary School.

Si SPO1 Ronnie Cubilo sa Police Station 6 (PS6) sa Puerto nibutyag sa Sun.Star Superbalita nga nahitabo ang insidente mga alas 1:00 sa hapon niadtong Biyernes samtang padulong nga mangiskwela ang duha ka bata.

Nihulat pa sa daplin nga bahin ang mga biktima nga makalabay ang mga sakyanan aron motabok apan kalit lang kining na-sideswipe sa Tagoloan Liner nga gimaneho ni Joel Salahag, lumad nga taga Malaybalay City hinungdan sa pagkasapon ni Lopian kinsa maoy sobrang naapektuhan. Samtang si Vencio igo lang nga natapsingan.

Gidala pagdali ang biktima Northern Mindanao Medical Center (NMMC) apan gideklarar nga patay na paghidangat. Si Vencio usab anaa sa kasamtangan sa Puerto Community Hospital.

Gibutyag sa mga nakasaksi nga nakita nilang nakiggukod ang maong dyip sa laing dyip ug ni-overtake kini hinungdan nga na-sideswipe sa mga tinun-an.

Giingong nisuway pa sa pagsibat ang driver apan nasikop sa kapolisan.