AMAHAN gikan naghatod sa iyang anak sa eskuylahan gipusil patay sa duha ka mga lalaki nga nagsunod kaniya sakay usab sa motorisklo sa Sityo Laray, Barangay San Roque, dakbayan sa Talisay kagahapon pasado alas 7:00 sa buntag.
Ang biktima mao si Arneste Denora, 52, biyudo nga adunay kapuyo, ug taga Sitio Panagdait sa nahisgutang barangay.
Matod ni PO2 Stephen Sefuesca sa Talisay City Police Station nga gikan naghatud ang biktima sa duha ka anak sa iyang kapuyo tunghaan ug paingon na unta siya sa pagtrabaho sa dakbayan sa Mandaue.
Duha ka mga lalaki ang nagsunod a diay kaniya samtang pag-abot sa lugar gipusil kini sa angkas tumong sa nagkadaiyang bahin sa lawas.
Si Dodong Denora, maguwang sa namatay, nitug-an nga iya pang naabtan ang iyang manghud nga nagtinga apan patay na sa iyang pagbalik sa dihang nikuha og sakyanan aron ihatud kini sa tambalanan.
Samtang si Cherry Ann Tapaya, 29, kapuyo sa namatay, mihulagway nga maayong tawo ang iyang kapuyo ug wala kini kontra.
Nasayran si Tapaya ang kasado apan buwag sab sa bana nga aduna nasa’y laing pamilya.
Matud ni PO2 Sefuesca miingon nga ila pang palawman ang ilang inbestigasyon aron masuta kon unsa gayoy motibo sa kremin.
Nakuha gikan sa crime scene ang lima ka kabhang sa .45 tuyo gyud sa mga responsable mao gyud ang pagpatay sa biktima base sa mga samad nga naangkon sa biktima.
Hinuon, lakip sa ilang susihon ang anggulo labot sa ilang relasyon sanglit kasado ang babaye ug laing susihon na anggulo mao ang trabaho sa biktima kon wala ba kini gikaaway. (DRT)