PATAY ang usa ka amahan human natabunan og yuta samtang nabali ang tiil sa anak niini didto sa Probinsya sa Lanao del Norte.

Deretsong nakabsan sa kinabuhi ang amahan nga mao si Manangkiran Alolong, 69, lumad nga taga lungsod sa Bacolod sa susamang probinsya.

Samtang nadala sa Northern Mindanao Medical Center (NMMC) ning siyudad sa Cagayan de Oro ang anak nga mao si Sibudin Alolong, 32, minyo, sa susamang dapit.

Nasayran gikan sa usa sa personahe sa NMMC nga nahinabi sa Sun.Star Superbalita nga nahitabo ang insidente niadtong Lunes mga alas 3:00 sa hapon samtang ang mga biktima nanguha og yuta sa maong dapit.

Giingong wala nag-ulan niadtong tungora apan nangatagak ang yuta sa ibabaw nga bahin hinungdan nga sila nga anaa sa silong niadtong tungora ang nangahulogan niini.

Mas nagrabehan ang amahan tungod kay nahulogan kini og bato ug natabunan pa og yuta ang tibuok lawas niini hinungdan nga deretsong nakabsan sa kinabuhi dihang naresponde ug nakuha gikan sa pagkalubong.

Nahulogan usab og bato ang tiil ni Sibudin hinungdan sa pagkabali niini.

Wala na madala ang amahan sa duol nga balay tambalanan tungod kay nakabsan na kini sa kinabuhi samtang si Sibudin gidal ning siyudad sa Cagayan de Oro.

Sa pagsulat ning balita luwas na sa makuyawng kahimtang ang biktima nga padayon pang giatiman sa mga doktor sulod sa NMMC. Samtang ang patayng lawas sa amahan nagpabilin sa puloy-anan didto sa Lanao.