NAKAHILAK ang asawa human nasapon ang kaugalingon nga bana nga dunay kauban laing babaye sulod sa lawak sa mismong puloy-anan niadtong Miyerkules mga alas 4:00 sa hapon sa Lapasan ning siyudad sa Cagayan de Oro.

Ang asawa nga si Vicky (bansagon gipugngan), 46, nga nahinabi sa Sun.Star Superbalita niingon nga tulo siya ka adlaw nga nawala ug nilakaw sa ilang puloy-anan tungod kay niuli ug nibisita siya sa iyang inahan nga anaa sa lungsod sa Jasaan, Misamis Oriental uban sa iyang gagmayng mga anak.

Nibalik siya ning siyudad niadtong Miyerkules kay adunay gi-follow up nga papeles sa inahan dihang sa pag-uli niya sa ilang puloy-anan naaktuhan niya ang iyang bana ug usa ka babaye nga pulos walay sapot sulod pa sa ilang lawak.

Matud ni Vicky nga sakit kaayo ang iyang dughan sa nakita ug deretso na lamang siya nga nihilak.

Ang babae sab niadtong higayona dali nga nag-ilis og deretso nga milakaw sa ilang puloy-anan. Wala niya kini maila ug gibana-banang nag-edad kini og 20 pataas. Wala na kahigayon si Vicky sa pagsukmag niini tungod sa dili masabot nga gibati.

Wala sab nagdahom iyang bana niadtong tungora nga muoli siya tungod kay nagtuo kini nga madugay siya sa pagbisita sa iyang inahan.

Ang bana nga si Raul, 48, nangayo og pasaylo ngadto kaniya ug giingon niini nga ang nasaksihan niya mao ang unang higayon ug tinud-anay ang iyang paghigugma sa iyang asawa.

Sa kasamtangan nagpatabang si Vicky sa kapolisan sa Police Station 3 (PS3) sa Agora tungod kay desidido siya nga hatagan og leksiyon ang iyang bana.