Besere: Bisan uugod-ugod na

Tuesday, March 9, 2010

By Jen L. Besere
Labtik

UNSA kaha ang giapas niining mga politiko nga kong atong tan-awon dili na gyud makakaya pagserbisyo sa katawhan apan nagpapili lang gihapon alang sa usa ka posisyon.

Have something to report? Tell us in text, photos or videos.

Sa panahon karon morag hipokrito ra sab kaayo kong moingon kita nga serbisyo gyud ang tumong niining maong mga politiko. Ingon pa lagi sa akong higala, unsaon man daw kay diha sa politika anaa man kuno ang daghang kuwarta.

Bisan kong dul-an na mo-retire o duna gyuy pipila nga ang edad mi-retiro na apan anaa gihapon nagkandarapa sa pagpangampanya aron iboto sa katawhan. Bisan kong nanakit na ang mga tuhod kay gitaptan sa rayuma, hala gihapon.

Ang labing maayong buhaton niining atong mga politiko nga mga wanggets, angay na ni mopahulay ug i-enjoy ang mga nahibilin nga mga adlaw sa ilang kinabuhi uban sa ilang pamilya. Ug dili ikalimod nga daghan man gyud kini sila og mga sapi, ila na lang unta kini nga pahimuslan mintras buhi pa sila. Dili na mag-apil apil diha sa pagpamolitika ug ihatag na ngadto sa mga batan-on nga dunay mga kapas ang pagserbisyo sa nasud.

Nakahinumdum ko sa usa ka pari nga naghisgot bahin sa mga hamtong ug mga batan-on nga nag-alagad diha sa simbahan. Duna kunoy mga hamtong nga akop-akopon kaayo sa trabaho ug nagtuo nga sila ang nakahibalo sa tanan. Wala gihatagan og higayon ang mga batan-on. Bansayon kuno unta ang mga batan-on aron mahimong hanas. Apan lahi ang pipila ka mga tigulang kay walay salig sa mga batan-on nga ang tinuod ra ba dunay mga batan-on nga mas nakahibalo pa kay mga tigulang.

Sa laing bahin tungod kay nagsingabot na man ang piliay nagtimbang-timbang na usab kining mga botante kong kinsa ang ilang botaran.

Duna koy nadungog nga diha kuno sa usa ka lungsod sa Misamis Oriental lutaw kaayo ang ngalan sa usa ka presidentiable ngadto sa mga sakop sa New People's Army. Kay kuno naghatag kuno ni og dakong kantidad ngadto sa rebeldeng grupo. Unsa kaha kini ka tinuod?