ATONG mga pahalipay sa Sun.Star Superbalita Cebu sa ilang ika-15 na katuig nga pagserbisyon sa mga Sugboanon, gikan sa kinatibuk-ang puwersa sa Sun.Star Superbalita Cagayan de Oro.

Niadtong Oktubre 23, 1994 nigawas ang unang isyu sa Sun.Star Superbalita sa dakbayan sa Sugbo ug dali ra kaayo kini nga nilambo tungod kay gihangop man sa tanang matang sa katawhan ug mga sektor. Gikan sa mga labing taas ug posisyon hangtud na sa labing ubos nga tawo sa katilingban nagsunod sa Superbalita Cebu.

Kong atong itandi ang mga igsuong Superbalita sa ubang mga siyudad labi na gyud ning siyudad sa Cagayan de Oro taas-taas pa ang atong apason kong itandi sa kalampusan karon sa Superbalita Cebu. Apan kini tanan ato ra gihapon nga makab-ot sa umaabot nga panahon.

Sa ika-15 ka tuig sa Sun.Star Superbalita Cebu among mga panghinaut alang dugang nga mga kalampusan ug tiunay nga paghatud og lab-as nga mga balita ngadto sa komunidad.

Malipayon nga ika-15 ka tuig nga anibersaryo Kampiyon sa Bisaya!

Mga holiday

Makasinati na usab og taas nga holiday ang nasud sa sunod bulan ug mahatagan na usab sa mga empliyado ang ilang pamilya og taas nga panahon.

Kini human niguwa ang Proclamation No. 1669, ang Malacañang nideklarar nga ang Nobiyembre 1 ug 2 (Dominggo ug Lunes) usa ka special non-working holiday. Diin niining maong mga adlaw ang Pilipinas magsaulog sa Adlaw sa mga Santos ug Adlaw sa mga Kalag.

Ang laing holiday sa Nobiyembre 27 ug 28 nga natumong usab sa Biyernes ug Sabado. Ang deklarasyon may koneksyon sa selebrasyon sa mga Filipino Muslim sa Eid al-Adha kun Feast of Sacrifice.

Kining Eid al-Adha naila nga "Greater Eid' nga maoy ikaduhang laing dako nga Islamic Festival nga maoy motapos sa Haj kun pilgrimage sa minilyong Muslim nga mobiyahe sa Mecca sa Saudi Arabia matag tuig. Ang laing festival mao ang Eid al-Fitr, maoy motapos sa pagpuasa sa buwan sa Ramadan.

Ang Nobiyembre 30 gideklarar usab nga special non-working holiday alang sa kasaulaogan sa Bonifacio Day.