Ni Jenefer L. Besere
Labtik

DAGHAN na kaayong mga kandidato ang nagpabati-bati na alang sa umaabot nga piliay sunod tuig. Bisan sa labing ubos nga posisyon sa usa ka dapit.

Dunay uban nagsugod na pagpanghatag og ginagmay nga butang o pagkaon aron lang mahinumduman sa umaabot nga piliay. Bisan pa kong sila moingon nga walay sagol politika niini apan dili gyud kalikayan nga mahatagan kini og kahulogan.

Sigurado gyud nga mahatagan kini og lain nga kahulogan kay karon man lang nahitabo nga nanghatag nga unta nanigwang na man sila sa maong dapit.

Bisan kong unsa sa kagamay sa butang kong kini kanunay nimo nga gihimo maka-ingon ang tawo nga tinud-anay gyud kini imong gibuhat.

Busa kitang mga bumobuto sa umaabot nga piliay dili unta kita mahaylo sa mga gipanghatag sa mga tawo nga buot magpapili karong 2010 nga eleksiyon.

Hikog

Karong panahona nga uso ang hikog daw gisakyan usab kini nga higayon sa mga kreminal.

Sama sa nahitabo sa usa ka sekyu nga si Arnel Vicente, 34, Kolambog, Lapasan ug nagtrabaho sa Alwana Farm sa Cugman ning siyudad. Si Vicente napalgan nga wala nay kinabuhi ug nakaangkon og samad pinusilan.

Dunay pagtuo nga nagpusil sa iyang kaugalingon ang maong sekyu samtang ang asawa niini dili makatuo nga himuon kini sa iyang bana tungod kay mahadlokon kini sa Ginoo ug nagtuo nga dakong sala ang paghikog.

Angay siguro nga imbestigahan kini og maayo sa kapolisan aron mahatagan og katin-awan ang pamilya sa biktima sa tinuod nga hitabo. Ug kong tinuod ang pagtuo nga dunay foul play sa kamatayon sa sekyu mahatagan usab kini og hustisya.

Bagyo

Sunod-sunod ang paghapak sa mga bagyo sa nasud. Gani wala pa maka-recover ang mga biktima sa bagyong Ondoy nisulod na usab ang bagyong Pepeng ug giingong duna na usab umaabot nga bagyong Quedan.

Makaluluoy kaayo ang katawhan nga apektado niini labi na sa Kaulohan diin maoy grabeng naigo sa mga bagyo hinungdan sa grabeng pagbaha.

Busa, leksiyon na kini kanatong tanan. Karon pa lang sugdan na nato bisan sa simple nga paagi diha sa paglabay og insakto sa atong mga basura.