Besere: P1,500 bugti sa lisensiya?

Friday, March 12, 2010

AKONG hisgutan karon kining usa ka polis nga tig-areglo niining mga traffic violation o mga aksidente sa dalan. Sa laktod nga pagkasulti, polis nga anaa madestino sa Roads and Traffic Administration (RTA).

Dili nako nganlan ning maong polis apan kon mabasa kini sa maong polis siya nasayod na nga siya ang akong buot ipasabot niini.

Have something to report? Tell us in text, photos or videos.

Niadtong niaging adlaw dunay nagbangga nga mga sakyanan ug SOP respondihan kini sa mga sakop sa RTA aron pagtino sa hitabo. Aron pagmubo sa estorya, nagkasabot na ang duha ka mga drayber sa sakyanan sa mga bayrunon alang sa insurance sa maong sakyanan. Gani gihatagan na og ticket ang usa ka drayber aron siya makapadayon sa pagmaneho bisan kong wala pa ang iyang lisensiya human gikuha kini sa maong polis kay lagi wala pa man nahitabo ang bayranay tali sa tag-iya sa maong sakyanan niadtong higayona. Pag-abot sa adlaw sa tingbayad ug sa pagtuo nga husay na ang tanan, kuhaon na unta sa usa ka drayber ang iyang lisenysa ngadto sa polis nga naggunit niini. Apan unsa bang pagka-unsaa nga gipangayoan man siya og P1,500. Nidumili paghatag ang maong drayber tungod sa kadako sa maong kantidad hinungdan nga niingon ang maong polis nga P500 na lang ug siya na ang bahala sa tanan.

Nahatag gyud ang P500 nga walay resibo tungod kay gi-atangan ra man siya sa dalan ug giingnan pa nga partial pa kadto, buot ipasabot maningil pa siya sa P1,000? Dihang atong gipangutana sa buhatan sa RTA atong nasayran nga duna gyuy bayran kong kuhaon ang lisensya apan dili ra moabot og P500 ug mahimo ra nga hangyuon.

Pila na kaha ka P1,500 o P500 ang nakuwarta ning maong polis gikan sa mga drayber?

Pasalamat kang polisa ka nga wala ka gidangop ngadto sa buhatan sa NBI alang sa entrapment. Ang gaba ra ba dili magsaba sir! Moabot ra gihapon ang panahon nga masapon ka ra sa imong mga tinunto diha sa maong buhatan. Nangdalahig ka lang sa pangalan sa maong buhatan.

Makadiskorahe kini nga matang sa atong kapolisan. Hinaut unta nga hatagan kini og pagtagad sa mga kadagkoan sa maong organisasyon aron dili kita maka-ingon nga ilang gipang-tolerate kining mga matang sa polis.