Besere: Pagpuhag sa plantasyon sa marijuana

Tuesday, January 26, 2010

DAKO kaayo nga kalampusan sa mga awtoridad ang pagkapuhag sa duha ka mga ekstaryang plantasyon sa marijuana sa Brgy. Canangaan, Cabanglasan, Bukidnon nga mobalor ngadto sa P15 milyones.

Angay pahalipayan ang mga grupo nga naglangkob sa maong kalampusan sama sa Philippine Drug Enforcement Agency (PDEA) Region 10, 403rd Brigade sa 8th Infantry Batallion, Philippine Army ug Philippine Air Force.

Have something to report? Tell us in text, photos or videos.

Malampuson nga nasulod sa mga otoridad ang duha ka ektaryang plantasyon sa marijuana nga giingong tinanom sa Front Committee 89 sa rebeldeng New People's Army (NPA) sa lugar.

Ang mga sibilyang ang nitug-an sa mga awtoridad nga adunay lapad nga plantasyon sa marijuana sa maong lugar hinungdan sa gipahigayon nga operasyon ginamit ang helicopter sa Philippine Air Force.

Dili kini tiaw nga kantidad sa maong tanom, kong wala pa kini masapon pila na usab unta ka mga tawo ang mabuang sa pagsimhot niini. Mosaka na usab unta ang gidaghanon sa mga batan-on nga madaut tungod sa bisyo pagyupyop og marijuana. Ambot kong unsa ba kaha ang ilang makuha sa paggamit niini.

Siguro wala mag-inusara kining maong plantasyon ug dako ang posibilidad nga duna pay ubang mga planstasyon nga angay sutaon sa mga awtoridad.

Walay mga rebelde nga naabtan ang mga awtoridad sa maong lugar. Ang pangutana sa katawhan kinsa man ang pasakahan og kaso aron manubag niini tanan?

Akong nahinumduman kadtong pagpangronda sa gituohang shabu laboratory kaniadto pipila ka mga tuig ang ninglabay, kumusta na ba ang maong kaso? Nasentensyahan na ba ang mga suspetsado o nahanaw na daw bula?

Atong mga pahalipay ngadto sa mga naglangkob sa maong operasyon ug mga panghinaut nga dili lang unta taman sa pagpuhag og plantasyon kundili lakip na ang pagsikop sa mga responsable.