GIPUSIL sa nakamotorsiklo ang sakop sa notoryos nga grupong Batang Mindanao (BM-29) niadtong Sabado mga alas 11:30 sa gabii sa Cugman ning siyudad sa Cagayan de Oro.

Nadala sa Northern Mindanao Medical Center (NMMC) si Michael Ra¤eses, 24, minyo, taga Zone-2, sa susamang barangay.

Apil sa naigo si Felicito Lictao, 34, sa susamang dapit, kinsa igo lang nga nipalit og tambal niadtong tungora.

Si PO2 Dexter Lumantas sa Police Station (PS10) sa Cugman nga nahinabi sa Sun.Star Superbalita niingon nga bag-o lang nakagawas sa prisuhan si Raneses.

Daw kasagaran sa krimen nga himuon niini ang mga pagpangawat ingon man pagpanulis.

Nag-estambay lamang ang biktima dihang gilabyan sa duha ka suspetsado nga nakamotorsiklo ug gipusil makatulo ka higayon, nagbuy-od ang biktima ug nagkadugo nga girespondehan sa kapolisan.

Posibleng grupo sa vigilantes ang responsabli sa pagpamusil sa biktima.

Apan swerte lamang si Raneses tungod kay dili mga fatal area ang naigo sa iyang lawas bisan pamang tulo ka bala ang niigo niini.

Naigo usab sa bala si Lictao kinsa igo lang nga nipalit og tambal niadtong tungora. Nakurat kini pag-ayo sa nahitabo human naigo ang tiil gidala usab sa NMMC.

Ang kaso padayon pang giimbestigahan sa kapolisan. (SVB)