SUGDAN karong adlawa ang pagbutang og mga polis sa tanang sementeryo ning siyudad sa Cagayan de Oro subay sa gilusad nga "Oplan Kaluluwa".

Si Insp. Buenaventura Reyes hepe sa Police Station 2 (PS2) sa Cogon nibutyag sa Sun.Star Superbalita nga adunay 100 ka mga polis ang ibautang sa Bolonsori Cemetery ug moabot ngadto sa 700 ka mga polis ang ipahimutang sa tibuok sementeryo sa siyudad.

Nagpabilin usab ang police visibility sa mga kadalanan, malls, bus terminal, merkado ug uban pang lugar nga crime prone area.

Matud ni Reyes nga karong ala 1:00 sa hapon makit-an na ang mga polis sa bisan-asang sementeryo ug matapos sa petsa 3 sa buntag sa Nobiyembre.

Ipahigayon sa kapolisan sulod sa sementeryo ang operation kapkap ingon man pagbantay sa mga dautang elemento aron malikayan ang posibleng krimen.

Tungod niini gidili sulod sa sementeryo ang mga ilimnong makahubog nga maoy posibleng hinungdan sa kagubot, mga karaoke ingon man ginadili ang pagkanta-kanta, kutsilyo o bisan unsang klase sa armas ug mga fire crackers.

"Ang buhaton lamang nila sulod sa sementeyo mao ang pagbisita ug pag-offer sa prayers," matud ni Reyes. 

Samtang 24 oras nga nakaalerto ang kapolisan ning siyudad aron mamintinar ang kahusay ug kalinaw sa siyudad.

Gipahimangnoan usab ang mga pamilya nga dili tanan mobiya sa puloy-anan aron malikayan ang mga pagpangawat.  

Kung ugaling mobiya man sigurohon nga naka-lock ang tanang pultahan aron
dili masudlan sa kawatan.