NIULBO ang dakong sunog sa usa ka establismento niadtong Martes mga alas 6:30 sa Brgy 22., Osme¤a Extension ning siyudad sa Cagayan de Oro.

Nagsugod ang kalayo sa 2nd Floor nga bahin sa Commercial Building nga gipanag-iyahan ni Jhonny de Vera nga mao ang FMN Agricultural Supply nga gi-okupa ni Concepcion Nu¤ez.

Si SFO2 Rosalito Caratao kinsa chief investigator sa Bureau of Fire Protection (BFP) niingon nga namatikdan lamang sa mga nakalabay ang kalit nga pagbuto ug pag-ulbo sa sa kalayo.

Nasayran nga ang maong establismento napuno og baligyang fertilizer hinungdan nga sakit sa mata ang aso niini gawas pa nga adunay lain nga baho.

Gibana-banang moabot ngadto sa P200 mil ang danyos sa sunog apan padayon pang gisuta ang hinungdan niini.

Dako usab ang pasalamat sa taga BFP nga dali lamang nga natabang ang kalayo ug wala na mikaylap sa kasikbit nga mga dapit ingon man sa likod nga bahin nga adunay daghan balay.

"Open field ang sunog mao nga sayon ra sa firetruck og bombero ang pagpalong sa kalayo," ni Caratao.

Apil sa gipasalamatan nga walay nangaangol sa maong hitabo tungod kay sirado na ang maong tindahan.
Gituohang faulty electrical wirings ang sinugdanan sa sunog tungod kay namatikdan man ang pagsiga ug pagbuto niini.