SUSIHON sa Election Registration Board (ERB) sa Commission on Election (Comelec) ang tanang bag-o nga nagparehistro nga mga botante aron masuta ang gikataho nga mga flying voters, pamahayag sa opisyal sa Rehiyonal nga buhatan sa Comelec.

Si Comelec Regional Director Renato Magbutay nagkanayon nga magpahigayon og marathon hearing ang ERB sa mosunod nga mga adlaw aron matino kinsa sa mga bag-ong rehistradong mga botante ang nag-flying voters o nag-double entry.

"Dapat magsumiter sa ilang position paper ang nagkadaiyang mga political parties kalabot sa giingong flying voters labina sa ilang area aron mahatagan dayon og aksiyon sa Comelec," matod ni Magbutay.

Kahinumduman nga sa nilabayng bulan nabantayan sa mga opisyal sa City Comelec ning siyudad nga dunay nagbalik-balik og parehistro sa ilang buhatan ug nahibaw-an kini dihang gitan-aw sa computer.

Si Magbutay nagkanayon nga lisod na nga dunay mahitabong pagpanikas atol sa eleksiyon sa Mayo 2010 tungod sa bag-ong sistema nga ipatuman nga mao ang automated election.

Gitubag usab ni Magbutay ang pamahayag ni lawyer Antonio Soriano, kanhi bise mayor ning siyudad nga dako ang posibilidad nga dunay mahitabong pagpanikas diha sa poll automation.

"The window of chance to hack the computer during election is gamay ra gyud kay grabe ang security code nga gibutang sa machine," dugang ni Magbutay.

Samtang dili pa mahatag sa Comelec ang kinatibuk-ang gidaghanon sa bag-ong rehistradong mga botante hangtod dili kini moagi sa pagtuki ug pag-uyon sa ERB pagmatuod nga balido ug dili kuwesiiyonable ang maong botante.