Giposposan og bato, patay

Tuesday, February 9, 2010

PATAY ang 51 anyos nga lalaki human gibundakan og bato niadtong Domingo mga alas 5:00 sa kadlawon sa Brgy. Dansolihon, ning siyudad sa Cagayan de Oro.

Giila ang biktima nga mao si Isidro Sabelo, minyo, lumad nga taga Sitio Balawon, lungsod sa Talakag, Bukidnon.

Have something to report? Tell us in text, photos or videos.

Gitumbok nga suspetsado mao si Julieto Taluhan, hingkod ang edad, mulopyo sa Dansolihon ning siyudad.

Sa gihimong pakighinabi sa Sun.Star Superbalita ngadto kang Senior Police Officer 1 Saul Abel Yacapin sa Police Station 8 sa Lumbia gibutyag niini nga panagbikil sa yuta ang nitumaw nga motibo sa pagpatay.

Nasayran nga sayo nga milakaw sa puloy-anan sa Dansolihon ang biktima dihang giatangan ni Taluhan.

Taod-taod na nga nagkabikil sa yuta ang duha diin daw gusto nga maangkon ni Taluhan ang yuta nga anaa giatiman ni Sabelo. Unang nagsukmaga ang duha apan nisangpot ngadto sa pagpospos og bato.

Giposposan niini og bato ang ulo ni Sabelo hinungdan sa pagkadugmok niini ug patay diha dayon, gani wala na nadala sa balay tambalanan ang biktima.

Dihang giresponde sa kapolisan ang hitabo, deretso sab nga nasikop ang suspetsado ug nagtingkagol ning panahona sa prisuhan.

Sa pagsulat ning balita nagpabilin pa sa Bollozos funeral parlor ang patayng lawas nga natigayong dalhon sa puloy-anan niini.
Samtang kasong murder ang atubangon sa suspetsado diin mga hingtungdan desidido sa pagpasaka og kaso. (SVB)