DESIDIDO ang usa ka inahan nga pasakaan og kaso ang anak human siya giposposan og botelya sa ilimnong makahubog niadtong Lunes mga alas 9:30 sa gabii sa Lawesbra, Lapasan ning siyudad sa Cagayan de Oro.

Nilandig sa Northern Mindanao Medical Center (NMMC) si Julieta (bansagon gipugngan human nihangyo ning mantalaan) kinsa nakaangkon ug dakong samad sa likod ug sa ulo nga bahin human giposposan sa anak nga si Catherine, 19.

Sa pakighinabi sa Sun.Star Superbalita ngadto kang Julieta siya miingon nga gikasab-an niya ang iyang anak tungod kay sugod pa niadtong petsa uno ning bulan nilakaw na ug petsa 2 sa gabii miuli nga hubog.

Tungod niini kalit lang nasuko si Catherine ug nikuha og botelya dayon deretso nga giposposan ang iyang inahan tungod sa pagpangasaba. Naigo ang likod sa inahan ug ang ulo nga bahin.

"Maayo man among relasyon sa akong anak wala gani ko nagdahom nga iya kong bunalan og botelya."

Giingong nangayo na og pasaylo ang anak sa biktima sa gibuhat niini apan gusto ni Julieta nga pasakaan og kaso ang anak oras nga makagawas sa balay tambalanan aron mahatagan og leksyon sa gibuhat niini.

Dugang sa biktima nga insulto para kaniya nga posposan lamang sa anak nga iyang hangyo ang respetuhon man isip usa ka inahan. (SVB)