IGO na lang sa pagpatambal ang usa ka kabit human giluba sa asawa sa iyang uyab.

Ang biktima giila nga si Mercedez, 19, taga Bulua ning siyudad kinsa giluba ni Susan (apelyido gipugngan), taga Patag ning siyudad.

Sa gihimong interbyu sa Sun.Star Superbalita ngadto kang Mercedez kinsa nihangyo ning mantalaan nga taguan ang iyang apelyido niingon nga nahitabo ang pagpangluba niadtong Domingo, mga alas 5:30 sa hapon samtang siya kuyog ang bana ni Susan sa Bulua nga bahin ning siyudad.

Giingon niining wala silay gibuhat nga dautan niadtong panahona apan kuyog lamang nga nasapon sa asawa.

Daw namula ug dili mahitsura ang nawong ni Susan hinungdan nga giayo og sagpa niini ang biktima, wala pa makuntento nipunit kini og baga nga barbecue stick dayon giluba kini makaduha ka higayon hinungdan sa pagkaigo sa iyang abaga ug hawak nga bahin.

Gidala ang biktima sa Northern Mindanao Medical Center (NMMC) kinsa luwas na sa makuyawng kahimtang.

Nasayran gikan niini nga aduna silay relasyon sa bana sa suspek ug taod-taod na ang ilang panagkitaay apan tungod sa dakong gugma niini dili gyod niini mabiyaan bisan paman nasayod nga aduna kini tulo ka mga anak.

Daw mahadlok sab ang biktima nga biyaan ang lalaki tungod kay magsige kini og ingon nga maghikog.

Hinuon, walay plano nga mopasaka og sumbong ang biktima batok sa asawa. (SVB)