MAAYONG adlaw pag-usab mga igan, sano ug mga parekoy, Espoko Mo? nahibalik na usab kita dinhi, nawala kita sa pipila ka adlaw tungod sa mga hinungdan nga dili kalikayan sugo sa trabaho, ug karon na usab ako mobalik makig-agbat kaninyo sa paghisgut sa mga ulahing mga panghitabo sa palibot, gikan sa sports, sa politika, local man o national, o bisan unsa na lang under the heat of the sun, oy maninglis na man ni pre.

Unang tirada - lagi kay mibukal na ang takuri kanhi kaldero sa politika, 8 ka bulan na lang gikan karon ang atong gi-paabot nga 2010 national eleksyon diin mopili na usab kita sa mopuli ni Maninay Gloria isip atong pangulo sa nasud, VP nga mopuli ni Kabayan Noli de Castro, uban sa 12 ka mga Senador.

Mo-graduate na ang atong gi-idolo nga senador, matapos na ang 3 ka term ni kanhi Senate President ug kasamtangan Minority leader Aquilino Quilinquing Pimentel.

Ingon man mopili usab kita sa bag-ong Congressman, mga kagawad sa atong Sangguniang Panlalawigan, Mayor sa atong mga kalungsuran ug siyudad, Vice Mayor uban sa 8 hangtud sa 12 ka mga konsehal.

Himatikdan, pipila ka mga mayor ug mga konsehal anaa na sa ilang 3 ka term sa pag-alagad ug dili na sila pwede mokandidato pag-usab sa ika-4 nga higayon, sumala sa balaod sa susama nga posisyon nga karon ilang gi-alagaran.

Ehemplo niini, sa way pabor-pabor si si last termer Halangdong Mayor Rommel Maslog sa lungsod sa Talisayan. Dili na siya pwede magpasubli pagkandidato sa susamang posisyon. Mahimo siya magpa-pili sa pagka Bise Mayor susama sa gibuhat ni CDO Mayor Vicente Dongkoy Emano nga mi-us-os midagan pagka Bise din iyang giparot si kanhi Kagawad ug Manlalaban Alvin Calingin gikan sa pundok Magtajas niadtong miaging local nga eleksyon.

Apan, mga igan, sumala pa sa ulahing taho sa atong Spy nga Maya, si Mayor Rommel modagan na lang sa pagka Bise Mayor kapares o in tandem sa usa ka surprise lady Mayoral candidate. Ato siyang tawagon nga Mayora 1. Ug Espoko mo? mahimo usab nga mahigpit nga kalaban sa ulahi ang usa usab ka babaye. Tawagon nato siya nga Mayora 2, gikan sa pamilya nga mga politico, apo siya ug pag-umangkon sa kanhi 2 ka mga bise mayor. Ang iyang amahan nga usa ka doctor, nahimo usab kanhi nga OIC mayor sa iyang panahon.

Kinsa sila? O may purohan ba nga ang usa, palaron ug mahimong unang lady mayor sa Talisayan? Makatugot kaha si Barangay Capitan T o si Mr RO, laing gihugon-hugon ug nag-panikad usab nga magpapili nga sunod nga mayor? Ato sila hisgutan sa sunod natong panag-agbat dinhi mga igan ug mga parekoy.

Oooppss! Wala na man kitay espasyo dinhi, maayong panikay-sikay nalang mga kababayan ug sa tanang suking mag-babasa sa SS Superbalita diha sa Centro, sa Tagbocboc, ug Ssan Jose Village. (Sa sunod, sangay Governor Oscar Seriña Moreno gikan sa Balingasag batok sa usa ka bagitong congressman sa Tagoloan pagka Gobernador?) Cellphone no.: 0927-468-1986