HUMAN wala gidungog ang hangyo sa mga transport group atol sa strike niadtong Marso 31 mibahad sila nga mohimo og laing transport strike sa dili pa matapos ang bulan sa Abril.
Kini ang gibutyag ni Sonny Hinosolango kinsa coordinator sa Solidarity of Transport Alliance in Northern Mindanao(Starex-Piston) human wala gidungog ang ilang hangyo ug dili sila uyon sa P3.00 per liter fuel subsidy nga giaprobahan ni Presidente Noynoy Aquino.
Gibutyag niini nga ila pa nga giplano ang petsa sa sunod nga strike apan gisiguro nga sa dili pa matapos ang bulan sa Abril dunay mahitabo welga.
Usa sa giprotesta sa grupo ang kabahin sa walay hunong nga pagtaas sa presyo sa petrolyo, ingon man ang pagbasura usab sa Oil Deregulation Law nga maoy hinungdan nga nawad-an og control ang gobyerno sa presyo sa produktong petrolyo.
Apil sa panawagan ang pagbasura sa Value Added Tax sa mga petroleum products nga giingong adunay tag P7 matag litro nga maoy usa sa hinungdan sa kataas sa presyo sa lana.
Kini mao ang tipik sa mga gustong ipaabot sa mga transport group nga gilangkuban sa 30 ka mga organisasyon sama sa Jeepney Operators ug Drivers Association (Jodas), Tricycle Operators and Drivers Association (Todas) ug association sa taxi operators ug drivers sa siyudad sa Cagayan de Oro.
Pipila sa mga driver nga nainterbyu sa Sun.Star Superbalita wala niuyon sa pag-aprobar ni PNoy sa P3 per liter fuel subsidy tungod kay ilang gusto nga wagtangon gyod ang oil deregulation law.
Kahinumduman nga human sa transport strike nga natigayon ang Land Transportation and Franchising Regulatory Board (LTFRB) nianunsyo kalabot sa aproval ni Pnoy nga P3.00 per liter subsidy sa tanang transport sector.
Gibutyag ni LTFRB-Northern Mindanao Director Mandangan Darimbang nga ang mga public utilty jeepneys, taxi ug motorela hatagan og P3.00 matag litro nga discount aron maka-survive sa pagtaas sa presyo sa petrolyo.
Ma-avail lamang kini kung adunay fuel cards nga ma-claim sunod semana.
Hinuon adunay uban mga driver nga niuyon na lamang niini tungod kay wala naman mahimo.
"Mosugot na lang ta nga ina-ana kay wala naman mi mahimo mga driver, giparobahan naman na sa Presidente," usa ka driver nga nidumili sa pagpaila sa iyang pangalan. (Stephanie V. Berganio)