GIPATAY una gikawatan ang usa ka lalaki kinsa napalgan nga nagbuy-od sa Olape Road, P-3, NHA, Kauswagan ning siyudad Cagayan de Oro.

Nakabsan sa kinabuhi si Ricardo Iyog, 39, minyo, taga Sofia Compound, Zone-1 Bulua ning siyudad.

Sa gihimong pakighinabi sa Sun.Star Superbalita ngadto kang SPO1 Prisco Panen sa Police Station 4 (PS4) sa Carmen, kinsa usa sa nag-imbestigar sa kaso, nasayran nga nahitabo ang pagpangluthang niadtong Huwebes mga alas 6:00 sa gabii.

Sakay si Iyog sa motorsiklo paingon na mopa-uli sa pinuy-anan dihang gisundan sa duha ka mga lalaki kinsa sakay usab og motorsiklo.

Pahidangat sa ngitngit nga bahin, kalit giatangan ug deretso nga gipusil ang biktima nga niigo sa abaga niini.

Sumala sa 15 anyos nga nakasaksi sa hitabo, nagpakimaluoy pa si Iyog nga undangon na ang pagpamusil ug iyang ihatag ang butang nga anaa kaniyaÿhangyo nga dili lamang siya patyon.

Apan gipusil gyud kini makapila ka higayon ug gikuha ang pitaka nga anaa sa bulsa ni Iyog.

Giingong giti-onan pa og pistola ang saksi ug gibadlong sa inahan hinungdan nga dali dayon nga ningsibat ang mga suspetsado sakay sa naghulat nga motorsiklo. 

Matud ni Panen nga nakuha sa crime scene uban ni Police Inspector Arnold Bustarde sa Scene of Crime Operatives (Soco) ang lima ka mga basyo sa 9mm pistol, 5 ka deformed slugs, N70 nga cellphone, sieko watch ug ang XRM nga motorsiklo nagpdala sa plaka 9986.

Base sa resulta sa otopsiya, siyam ka mga samad ang naangkon ni Iyog ug kadaghanan niini sa ulo nga bahin nga maoy hinungdan sa daling kamatayon.

Sa pagsulat ning balita, naghimo pa og dugang imbestigasyon ang kapolisan aron pag-ila sa suspetsado ingon man pagtino sa motibo sa pagpatay samtang anaa na gidala sa Cosmopolitan Chapel ang patay’ng lawas sa biktima.(SVB)