GIGULGOL ang liog ug nahabwa ang tina-e sa 22 anyos nga lalaki human giayo og luba sa iyang kanhi kaaway sa ilawom sa Dinagasnan Bridge, Brgy. Looc lungsod sa Catarman, Camiguin.

Patay diha-diha dayon si John Christopher Salina, ulitawo, sa susamang dapit.

Gitumbok nga supetsado ang kanhi kaaway niini nga mao si William Pioca, 26, ulitawo taga Brgy. Manduwaw, sa susamang lungsod.

Sa gihimong pakighinabi sa Sun.Star Superbalita ngadto kang PO1 Rose Mary Sacal sa Catarman Police Station niingon nga ubay-ubay nga samad nilubaan ang naangkon ni Salina human giayo og luba ni Pioca gamit ang kutsilyo.

Nahabwa ang sulod sa ginhawa sa biktima ug diriyot nga maputol ang liog human gigulgol.

Dugang ni Sacal nga nahitabo ang insidente niadtong Huwebes mga alas 7:00 sa gabii samtang anaa nagtambay ilawom sa tulay ang biktima.

Dihang nahibaw-an ni Pioca nga anaa sa maong dapit niadtong higayona si Salina gisulong niini ang biktima tungod kay nagdumot kini pag-ayo pipila na ka bulan ang nilabay.

Human sa hitabo giingong nisuway pa sa pagsibat ang suspetsado apan ang mga nakasaksi daling nitaho sa kapolisan hinungdan sa pagresponde sa kapolisan ug deretso kining nasikop ug nagtingkagol karon sa prisuhan.

Matud ni Sacal nga suko kaayo ang pamilya sa gibuhat sa suspetsado.

Hinuon ning panahona, gisang-at na ang kasong pagpatay batok ni Pioca.