Magsuon gipanigbas, 1 patay

Tuesday, February 9, 2010

PATAY ang 27 anyos nga lalaki human gitigbas niadtongDomingo mga alas 3:00 sa hapon sa Gemelina-Calamansi St., Carmen ning siyudad sa Cagayan de Oro.

Giila ang biktima nga mao si Carmelito Saturno, minyo, sa susamang dapit ug gitumbok nga suspetsado mao si Kenneth Tampalay, usa ka sikad driver.

Have something to report? Tell us in text, photos or videos.

Si Senior Police Officer 2 Fernando Laspoa imbestigador sa Police Station 4 (PS4) sa Carmen nibutyag sa Sun.Star Superbalita ngawala pa matino ang motibo sa pagpanigbas labina nga nisibat ning panahona ang suspetsado kauban sa laing duha ka nga lalaking wala maila.

Nasayran nga pauli na niadtong tungora si Carmelito dihang giatangan sa grupo ni Tampalay ug unang gisukmag ang biktima ug gitabangan apan wala nakuntento si Tampalay mikuha kini og sundang dayon deretso nga gitigbas ang biktima.

Nakaangkon og samad sa nawong ug sa lain-laing parte sa lawas si Carmelito hinungdan nga dihang gidala sa JR Borja Memorial Hospital ang biktima dead on arrival kining gideklarar sa doktor.

Ang manghod niining si Joselito, 22, naulit sa gihimo ni Tampalay hinungdan nga gibalikan ug giayo sab og kulata, apan susama sa nahitabo kang Carmelito gitigbas gihapon ang biktima ni Tampalay ug wala pa nakuntento giluba pa kini.

Human niini nisibat si Tampalay kuyog ang laing duha nga nitabang niini sa pagpanukmag hinungdan nga wala na naabtan sa kapolisan dihang giresponde.

Sa taho nga nakuha sa kapolisan giingon nga daan na nga adunay personal nga panaglalis ang suspetsado ngadto kang Carmelito, mitumaw usab ang taho nga selos ang hinungdan sa pagpanigbas.

Hinuon kini nga kaso padayon pang gisunod sa kapolisan aron pagsikop sa suspetsado.