MISAKA na ngadto sa lima ka mga tinun-an ang nagpatala ug mireklamo batok sa ilang magtutudlo sa gihimong pagpangmolestiya sa Puntod ning siyudad sa Cagayan de Oro.

Ang suspetsado nagtudlo sa first year high school kinsa hugot nga gireklamo sa inahan human giingong pangbiktimahon niini ang iyang mga tinun-an.

Matud sa kapulisan sa Police Station 5 (PS5) sa Macabalan nga nahinabi sa Sun.Star Superbalita nga taud-taud na kining gireklamo sa mga tinun-an apan niadtong Sabado laing 14 anyos nga si Rey (tinuod nga ngalan gipugngan) ang nagpauban sa iyang inahan tungod kay wala na maantos ang gihimo sa maong magtutudlo.

Nasayran nga atol sa fieldtrip gipa-inom kini og ilimnong makahubog human gidala sa mismong puloy-anan niini. Giingong gihinol ang kinatawo sa biktima ingon man nibuhat pa og law-ay nga buhat.

Samtang dugang sa kapulisan nga ang laing upat mireklamo usab tungod sa susamang buhat sa maong magtutudlo ngadto kanila.

Pipila kanila hulgaon nga bagsakon sa subject niini kung dili musogot sa iyang gusto ngadto sa mga tinun-an. Tungod niini mapugos ang mga biktima paghatag sa gusto sa suspetsado.

Base usab sa police record nasayran nga kadaghanan himuon niini ang pagpangmolestiya sa mismong classroom ug puloy-anan niini.

Hinuon ang school principal sa maong tunghaan nihimo na ning panahona og aksyon ingon man pag-imbesitiga sa maong magtutudlo nga giingong naghatag og kaulaw ngadto sa tunghaan.

Samtang ang kapulisan nihulat lamang sa mga hinungtungdan nga pasakaan kini og tukmang kaso.