MULTAHAN ug prisohon na sa dili madugay ang bisan kinsa nga masayop pagkanta sa "Lupang Hinirang" sigun sa tukma nga musical arrangement sa composer nga si Maestro Julian Felipe tungod sa paglapas sa Flag and Heraldic Code of the Philippines.
 
Kini human giaprobahan sa Kongreso ubos sa House Committee on Basic Education and Culture sa third and final reading ang sugyot balaodnon nga magsilot sa sayop nga pagkanta sa National Anthem.
 
Ubos sa maong balaodnon pahamtangan og multa nga P100,000 ug duha ka tuig nga pagkapriso ang masayop pagkanta sa tukmang rendition sa Lupang Hinirang.
 
Gipasabot ni Kongresista Rufus Rodriguez, sa Ikaduhang Distrito ning siyudad nga konsiderahon nga usa ka krimen ug angay masilotan ubos sa Republik Act 8491 nga gilagdaan niadtong Pebrero 12, 1998 ang pagkanta sa Lupang Hinirang nga sukwahi sa musical arrangement ni Felipe.
 
Samtang sa iyang bahin si Kongresista Salvador Escudero III ang amahan sa maong balaodnon nagkanayon nga angay hatagan og respeto ang National Anthem ug dili usabon ang tukmang tuno.

"This measure proposesto prescribe standards with respect to the signing of the Philippine National Anthem, protocol and display of the Philippine Flag," dugang ni Escudero.
 
Gimando usab sa maong balaodnon nga magbutang og Philippine flag ang tanang buhatan sa gobiyerno ug pribado sugod sa National Flag Day Mayo 28 paingon sa Independence Day Hunyo 12 matag tuig.
 
Ang balaodnon gihingusgan nga mapalabang sa mga sakop sa Kongreso isip reaksiyon sa pagkanta ni Martin Nievera atoll sa Hatton-Pacquiao fight niadtong Mayo 3, 2009 diin giusab niini ang tukmang tuno sa Lupang Hinirang.