Matag tagay maghatag og kadaot

Tuesday, February 9, 2010

NILUSOT na iyang third reading ang balaodnon kon House Bill 7083 nga magsilot niadtong tawo nga magmaniho samtang ubos sa impluwensya sa ilimnon nga makahubog. Ulahi gyud ang Pilipinas apan maayo nalang kini kay sa wala.

Pasalamatan nato ang mga kongresista nga ningduso sa maong balaod. Unta molusot sab kini sa senado ug hangtod na sa Malacanang aron hingpit na mahimong balaod.

Have something to report? Tell us in text, photos or videos.

Ang ubang nasod sama sa Amerika estrikto kaayo nagpatuman aning balaod nga driving under the influence of alcohol kon DUI.

Dunay kahimanan ang mga polis sa pagsuta kon ang drayber milapas ba sa gidaghanon sa ilimon nga makahubog nga iyang nakonsumo. Unya, aron pagseguro dunay himuon nga aktwal nga examination - paglakwon ug pipila ka metro, ug kon mag-ikis-ikis ang nilaktan, posas na diretso.

Duna koy kaubang tigbalita dire sa Saipan, duha na ka bises siyang na DUI. Napriso og usa ka bulan unya gipamulta pa og $1,500. Sa ikatulo nga DUI, kanselado na imong lisensya.

Ang kasagaran sa nasod nga nagpatuman aning DUI nagdili usab pagbaligya og alak kon lapas na sa alas 12 sa gabii. Walay minor de edad ang makapalit usab og alak. Mamultahan o masirado ang tindahan nga magbaligya ngadto sa minor de edad.

Gumikan niining problemaha daghang disgrasya sa kadalanan nga nahitabo. Daghang kinabuhi nakalas ug kabtangan nga nadaot. Ang nakapait kay usahay ang hubog nga drayber maluwas sa kadaot samtang ang iyang gibanggaan nahurot og kamatay.

Kon buot man gyud sa gobiyerno nga mahunong na kining disgrasya sa kadalanan nga mugna sa mga 'palahubog' mas maayo hingusgan nila ang kampaniya pagpaminus sa pagkonsumo sa ilimnon nga makahubog.

Sa tinuod kining mga alak maoy labing giabusohan kay lagi walay limit ang pagpapalit. Ang pagpataas sa presyo sa alak maoy usa sa paagi. Epektibo sab ang pagbutang og higanting billboard sa kadalanan nga maghulagway sa daotang resulta sa magmahimo nga nakainom.

Mas maayo nga hatagan sa gobiyerno og gibug-aton pa kining kampaniya batok sa pag-inom. Kon sutaon nato ang statistic sa aksidenti sa kadalanan, makalilisang ang resulta. Daghang disgrasya nga naglambigit sa pag-drive nga nakainom.

Alang niadtong nagsige pa og inom, hunahunaa matag tagay nimo nagmugna ka og kadaot sa imong kaugalinong, pamilya ug ngadto sa imong isig katawo. Ang matag tagay walay igadulot nga kaayohan.