GIPIRMAHAN ni Presidente Gloria Macapagal Arroyo ang balaodnon paghimo sa Mindanao Polytechnic State College (MPSC) ngadto sa state university aron pagtubag sa demanda sa industriya ug mga business establishment sa Rehiyon 10 ingon man sa ubang bahin sa nasud alang sa high-level manpower.

Ang maong balaod-on gimugna ni Sen. Aquilino Pimentel Jr. ug Cagayan de Oro City 2nd Dist. Rep. Rufus Rodriguez ug gipirmahan sa Presidente ngadto sa balaod Senate Bill 1528 diin nag-convert sa MPSC ngadto sa Mindanao University of Science and Technology (MUST).

Ang signing gipahigayon niadtong Miyerkules sa MPSC compound sa Barangay Lapasan ning siyudad diin kini gitambongan usab nila Sen. Juan Miguel Zubiri, Cagayan de Oro 1st Dist. Rep. Bambi Emano ug Rep. Rodriguez.

Isip state college, ang MPSC gipadagan susama sa universidad diin ang main campus nahimutang sa Barangay Lapasan ug ang satellite campuses nahimutang sa Jasaan ug Alubijid sa Misamis Oriental; Oroquieta City, ug Panaon, Misamis Occidental.

Bugti sa kanunay nga high passing percentage sa engineering board examination ang MPSC napamatud-an ubos sa Category A sa Philippine Association of State Universities and Colleges (PASUC).

Ang MPSC usa sa 14 SUCs sa nasud diin kini gi-classified isip Level IV sa joint evaluation sa Commission on Higher Education (CHED) ug Department of Budget and Management (DBM).

Ang Pilipinas dunay kinatibuk-ang 110 SUCs.

Ang conversion sa MPSC ngadto sa MUST tubag sa panginahanglan sa Northern Mindanao alang sa pagpa-uswag ug dugang komprehensibo nga edukasiyon.

Gitawag nga CHED Zonal Research Center sa Region X ug Region XIII (CARAGA), ang MPSC giila usab sa Department of Science and Technology (DOST) alang sa iyang extension services. (TOP)