LOVE triangle ang usa sa anggulo nga gisubay sa kapulisan sa pagpangluthang patay sa usa ka miyembro sa Filipino-Chinese Chambers of Commerce.

Patay diha-diha dayon si Wilson Tsu o mas nailang si Zhou Liang Yuo, 37, minyo, nagpuyo sa Juan Luna St., ning siyudad ug nanag-iya sa usa ka tindahan sa mga spareparts sa Capt. Vicente Roa St. ning siyudad.

Nahitabo ang pagpamusil niadtong Biyernes mga alas 6:00 sa gabii sa parking area sa Gaisano Mall, Corrales Extension ning siyudad.

Sa gihimong pakighinabi sa Sun.Star Superbalita ngadto kang PO2 Rodrigo Reyes sa Police Station 3 (PS3) sa Agora, siya miingon nga padulong na nga mosakay sa iyang Toyota Innova nagdala og plaka ZFG-546 si Tsu dihang kalit lang gilabyan sa duha ka mga tawo nga nagmotorsiklo ug giluthang gamit ang gituohang kalibre .45.

Upat ka mga lalaki ang responsabli sa pagpamusil nga sakay sa duha ka mga motorsiklo nga kolor blue ug pula kinsa nagsul-ob ug bonnet ug naka jacket.

Nagbuy-od ug naligo sa kaugalingon nga dugo si Tsu sulod sa sakyanan niini nga nigunit pa sa iyang yabe.

Nakaangkon kini og tulo ka mga samad sa tiyan nga bahin, usa sa abaga ug usa sa ulo.

Nakuha gikan sa crime scene ang tulo ka basyo sa bala.

Matud ni Reyes nga base sa imbestigasyon nga gihimo, posibeleng may kalambigitan ang love triangle human adunay nakuha nga mensahe ang kapolisan sa cellphone niini may kalambigitan usa ka babaye.

Hinuon dili pa ikabutyag ang maong mensahe.

Gilantaw usab ang angulo kabahin sa negisyo niini.