MOABOT ngadto sa 31 ka mga motorsiklo ang nakumpiska sa kapolisan samtang 379 ka mga suspetsado ang nasikop atol sa peace and drive sa Cagayan de Oro City Police Office (Cocpo).

Samtang dunay lima ka mga video karera na ang nangasakmit.

Nasayran gikan kang PO3 Lloyd Opecio sa City Intelligence Branch nga nahinabi sa Sun.Star Superbalita nga ikalima na gipahigayon ang maong programa diin sa unang pagpangsikop adunay nadakpan nga 64 ka mga suspetsado; samtang sa ikaduhang operasyon dunay 97 ka mga suspetsado; gisundan sa laing 81 ka suspek ug 68 ka mga suspek ug bag-o lang sa ikalimang hugna sa pagpangsikop adunay 18 ka mga  motorsiklo nga walay rehistro ingon man adunay mga warrant of arrest batok sa 69 ka mga tawo.

Kini base sa gipasa nga report sa nagkalain-laing presintuhan sa siyudad diin karong adlawa ipahigayon ang presentation sa mga dinakpan.

Giklaro ni Opecio nga posible kini nga makuhaan pa ug madugangan kong ang mga nanag-iya sa mga motorsiklo mobalik aron ipakita ang ilang mga resibo nga nagpamatuod nga sila ang tag-iya sa motorsiklo.

Samtang ang ubay-ubay nga mga suspetsado nga nasikop, gibana-banang 50 porsiyento niini nakagawas sa prisuhan human walay pormal nga reklamo.

Matud ni Opecio nga ang mga nakumpiskang motorsiklo anaa sa lain-laing presintuhan gikostudya ug ipahibalo lamang sila kung gi-claim na kini sa tag-iya.