Presidente sa usa ka grupo gipatay

Tuesday, February 9, 2010

NAKABSAN sa kinabuhi ang usa ka presidente sa asosasyon human giluthang kagahapon mga alas 5:00 sa kadlawon sa Zone-10, Carmen ning siyudad sa Cagayan de Oro.

Giila ang biktima nga mao si Anseto Magno, minyo, taga Purok-4, sa susamang barangay, presidente sa usa ka asosasyon nga gitawag nga MCPLS United General Services Association Inc.

Have something to report? Tell us in text, photos or videos.

Sa gihimong pakighinabi sa Sun.Star Superbalita ngadto kang Senior Police Officer 2 Fernando Laspoa, imbestigador sa Police Station 4 (PS4) sa Carmen nibutyag nga wala pa matino ang motibo sa pagpangluthang labina nga nisibat dayon ang duha ka mga suspetsado nga sakay sa walay plaka nga motorsiklo.

Subay sa taho nga kadlawon na nga mag-ulian sa puloy-anan ang biktima tungod sa trabaho niini.

Pauli na ang biktima ug gituohang gisundan sa duha ka mga suspetsadong nagsul-ob og bonnet. Pipila lamang ka metros ang kalay-on gikan sa puloy-anan dihang deretso nga gipusil gamit ang kalibre .45. Kini base sa nakuhang pito ka mga basyo sa bala sa crime scene.

Matud ni Laspoa nga ubay-ubay nga samad pinusilan sa lain-laing parte sa lawas labina sa ulo ang naangkon sa biktima nga maoy gituohang hinungdan sa hinanaling kamatayon gani wala na madala sa balay tambalanan.

Girespondehan ang hitabo sa kapolisan sa PS4 uban sa mga sakop sa Scene of Crimes Operatives.

Nitumaw ang taho nga posibleng adunay kalambigitan ang trabaho niini sa nahitabo.

Daghan sab ang niingon nga buotan ug walay libog nga tawo si Magno gani napili man kini sa asosasyon nga presidente.