NAGSUGOD na pagsaka ang presyo sa mga bulak dili lamang sulod sa merkado ug simbaha kundili lakip na sa mga sementeryo ning siyudad sa Cagayan de Oro.

Nasayran gikan kang Rosita Angeles, 43, minyo, taga Bayabas ning siyudad nga nahinabi sa Sun.Star Superbalita nga misaka ngadto sa P5 ang iyang presyo sa bulak sama sa P5 nga rosas mahimo na kini og P10 ngadto P15 matag usa. Ang antorium nga P20 ang usa mahimo na nga P25 ning panahona.

Giklaro usab niini nga dili tungod kay kinahanglan kaayo ang mga bulak sa kalag-kalag gipatas-an na ang presyo apan tungod sa ka minos sa supply sa mga bulak ning panahona tungod sa kadaghan sa order.
Hinuon ang presyo sa kandila nagpabilin gihapon sa naandan nga presyo sama sa tag P1, P2 ug ngadto sa P5.

Gani si Mirasol Abueva, nihatag sa iyang pahimangno ngadto sa mga magbisita sa mga pantyon nga dili biyaan ang kandila labina mga mahalon nga kandila tungod kay dunay mga manguha niini.

Apil sab ang mga mahalon ug mga maayo ang hitsura nga mga bulak kini base sa iyang kasinatian niadtong niaging tuig.