ALERTO ang kapolisan ning siyudad sa Cagayan de Oro atol sa kasaulogan sa Semena Santa.

Namatikdan nga ubay-ubay sa mga pasahero ang nagdasok sa nagkalain-laing bus terminal ning siyudad paingon sa mga probinsiya.

Tungod sa kadaghan sa tawo dili malikayan ang krimen nga mahitabo sama sa mga pagpanglabni, panguot ug panulis hinungdan nga ang kapolisan alerto sa ilang tagsa-tagsa ka mga dapit.

Sa gihimong pakighinabi sa Sun.Star Superbalita kang PO3 Jigger Rojo sa Police Station (PS) 3 sa Agora siya niingon nga duha ka mga bus station ang nasakop sa ilang area hinungdan nga gimando sa ilang kadagkuan ang pag-monitor niini.

Matud ni Rojo nga ang mga polis mag-roving sa tibuok bus terminal aron bantayan ug pugngan ang krimen nga mahitabo.

Ingon man dunay mga polis nga magsul-ob lamang og plain clothes aron mag-obrserbar sa palibot ug sitahon ang mga tawo nga adunay kadudahan nga mga lihok.

Samtang si Deputy Alfredo Caralde saÿPolice Station 10 (PS10) sa Cugman niingon sa Sun.Star Superbalita nga ang Malasag Garden sa Cugman ning siyudad diin nasakop sa ilang area hugot ang ilang pag-monitor sa maong dapit diin gilauman ug naandan nga dugokon sa mga tawo panahon sa Mahal nga Adlaw.

Ipahigayon sa kapolisan ang operation kapkap ngadto sa mga mosaka sa Malasag area ug gidili ang pagdala og mga ilimnong makahubog, lighter, ug mga hait nga hinagiban sa maong dapit.

Tungod niini ang tibuok puwersa sa kapolisan nanghinaut nga magmalinawon ang kasaulogan sa Semana Santa ning dakbayan sa Cagayan de Oro.