"TIYAGA lang gyud, magtinabangay, ug kong puwede magnegosyo kung mahimo kay sa negosyo kanunay mosaka ang kwarta."

Kini ang kanunay gisulod ni Rey Abontalla sa iyang hunahuna hinungdan nga iyang nakab-ot ang iyang mga pangandoy alang sa iyang mga igsuon.

Si Rey, 39, nga taga Zone 2, Barangay 26 ning dakbayan sa Cagayan de Oro ug kamagulangan sa unom ka mga anak nipahuman pagpa-eskwela sa iyang lima ka mga igsuon pinaagi sa paghimo ug pagpamaligya og siopao.

Kini human namatay ang iyang amahan niadtong tuig 1999 kinsa mao gyud ang maghimoay og siopao. Dihang nakabsan sa kinabuhi ang iyang amahan nihangyo kini kaniya ug sa iyang inahan nga si Feliza, 62, nga pahumanon gyud sa pagpa-eskwela ang iyang mga igsuon.

Nihunong sa iyang pagtungha si Rey aron ipadayon ang ilang negusyo nga paghimo og siopao.

"Kung magpadayon man gud ko ato nga time sa pag-eskwela sure ko dili makahuman akong mga manghod kay wala may magpadayon sa negusyo ni papa, ako man gyud nanguunay sa paghimo og siopao," asoy ni Rey.

Gikan niadto, sayo nga momata si Rey mga ala 1:00 sa kaadlawon aron magmasa og harina nga himuon og siopao.

Dihang makaluto na, ipanghatod na usab kini ni Rey ngadto sa canteen sa mga tunghaan sama sa Liceo University, Xavier University, Capitol University, sa City Central School, Camaman-an ug Lapasan Elementary School, ug uban pa nga nga tunghaan. Aron maka-save sa pamasahe sa pag-deliver, magbisiklita lang si Rey.

Samtang wala gyud gisaligan ni Rey ang inahan tungod kay duna usab kini sakit.

Ang paghimo og siopao dako kaayo og tabang sa maong pamilya tungod kay magsalbar gyud kini sa ilang pang-inadlaw-adlaw nga panginahanglan sama sa pamasahe sa iyang manghud paingon sa tunghaan. Si Rey mokita og P2 mil kapin matag adlaw ug kini usab ang gisaligan alang sa tuition sa iyang mga manghud.

Dili usab sayon ang gi-agian nga kasinatian ni Rey diha sa iyang pagpang-deliver og siopao labi niadtong higayon nga siya nadisgrasya dihang naatrasan og sakyanan ang iyang gisakyan nga dyip.

"Aksidente gyud ang hitabo kay natangtang pa ang akong upat ka ngipon, nabali ang akong tiil ug kamot kay naipit man gyud ko ug maayo, abi nako mamatay nako kay ipa-stay ko sa doktor sa hospital for 45 days mao nga na-stop gyud among negusyo ato, galisod pa gyud ko sa paglihok," dugang ni Rey.

Apan luyo sa mga pag-antus nilampos ang mga igsuon ni Rey human sa pipila ka mga tuig sa maong paghimo og siopao nakahuman gyud sa pag-eskwela ang mga manghud ni Rey. Una nga nakalampos si Ruel sa kursong Marine Engineering sa Capitol University (CU) ug nagtrabaho na sa kasamtangan didto gawas sa nasud. Sunod nga nilampos si Allan sa kursong Geodetic Engineering sa Cagayan de Oro College (COC) ug nagtrabaho karon sa LBC. Gisundan usab ni Jovie sa kursong Management Accounting sa Liceo de Cagayan University (LDCU) ug nagtrabaho ning panahona sa LCG Marketing. Si Conie ni-graduate sa kursong Commerce Major in Management sa Liceo de Cagayan University (LDCU) ug kasamtangan nagtrabaho sa Gothong, ug ni-gradawar niadtong bulan sa Marso si Alfie Jun sa kursong Nautical Engineering sa Capitol University ug nag-training na sa kasamtangan.

Wala na gihuna-huna ni Rey ang iyang kaugalingon gani nagpabilin siya nga ulitawo karong panahona. Apan dako ang iyang kalipay nga nagmalampuson ang iyang mga manghud.

"Siyempre nalipay ko pag-ayo magtan-aw sa ila karon ngapulos professional," dugang niini.

Sa kasamtangan, nihunong na sa iyang negusyo si Rey kay kuno wala na man siyay gastuhan ug ang iyang mga manghud karon nga duna nay mga trabaho naghuna-huna usab kaniya ug hinatagan na lang siya og unsa ang iyang kinahanglanon.

Alang kang Rey, kong anaa ang pagpaningkamot sa duha ka parte makuha gyud ang gipangandoy sa kinabuhi.