KASAMTANGAN pa nga gihikay ang mga papeles ingon man medical examination result aron tukmang mapasakaan og kaso ang 66 anyos nga lalaki kinsa giingon nanglugos sa 29 anyos nga special child sa usa sa barangay sa Cagayan de Oro.

Giila ang biktima nga si Katrina (tinuod nga ngalan gipugngan).

Sa gihimong pakighinabi sa Sun.Star Superbalita ngadto kang PO3 Nolasco Gaabucayan sa Police Station 2 (PS2) sa Cogon siya miingon nga taud-taud na nga nahitabo ang pagpanglugos apan bag-o lang nga nahibaloan sa paryente sa biktima.

Si Katrina nga nahinabi usab sa Sun.Star Cagayan de Oro niingon nga nahitabo ang pagpanglugos makapila ka higayon sulod mismo sa puloy-anan sa suspetsado diin kini nagpuyo isip tabang-tabang sa magtiayon.

Nasayran nga igsuon sa inahan sa biktima ang asawa sa gitumbok nga suspetsado kinsa asawa sa kanhi barangay kapitan sa usa ka barangay ning siyudad.

Nagpuyo ang biktima dihang namatay ang iyang inahan tuig 2004 apan gideklarar kining missing sa iyang ayaan human nilakaw sa puloy-anan ang biktima kay wala na nakaagwanta ang nahitabo kaniya.

Nahitabo ang pagpanglugos niadtong Pebrero 6 ug 10, Marso 29, April 9 ug nasundan ning Septiyembre 3 ning tuig dihang wala sa puloy-anan ang iyang ayaan.

Dugang sa biktima nga mahitabo lamang ang pagpanglugos kung sila lamang duha sa suspetsado ang mahibilin.

Bisan-unsang sexual act ang ipabuhat niini ngadto kaniya. Gitug-an sa biktima ang nahitabo kaniya sa iyang ayaan apan nasuko kini ug dili motuo nga nahimo sa iyang bana.

Tungod niini, milakaw si Katrina sa puloy-anan ug gipagawas sa ayaan nga missing kini ngadto sa mga paryente.

Apan niadtong kalag-kalag, nibisita ang biktima sa pantyon sa iyang inahan hinungdan nga nakita kini sa iyang iyang mga paryente hinungdan nga gipangutana kini unsay hitabo.

Nakahigayon sa pagtaho ang biktima kanila hinungdan nga giubanan sa PS2 aron ireklamo ang gibuhat sa suspetsado.

Nasayran nga nangayo pa og pasaylo ang suspetsado ngadto kang Katrina pinaagi sa usa ka affidavit nga ginotaryohan sa usa ka abogado ug giingong napasaylo na sa biktima apan ang kapolisan niingon nga walay makapugong nga pasakaan og kaso ang suspetsado kung mapamatud-an nga tinuod ang gihimong pagpanglugos niini. (uban sa taho ni JPN sa SSCDO)