GIDAWAT sa pipila ka mga taxi driver ang desisyon nga wala pagtugot sa gihangyong umento sa pletihan sa taxi ning siyudad sa Cagayan de Oro.

Gibutyag ni Director Aminoden Allan Guro, sa Land Transportation Franchising and Regulatory Board (LTFRB), nga siya dili uyon sa hangyo sa Cagayan de Oro Federation of Taxi Drivers Association nga madugangan og 50 porsiyento ang pletihan sa taxi gikan sa alas 10:00 sa gabii ngadto sa alas 3:00 sa kadlawon.

Tungod kay nakalapas kini sa nauyonan nga taripa sa pletihan sa mga sakyanang pangpubliko. Gawas pa nga gikinahanglan una ang pagpahigayon og public hearing aron masuta kon uyon ba ang katawhan sa maong hangyo.

Si Roberto Valledor ug Hermeno Angeles, pulos mga taxi drivers sa siyudad nga nahinabi sa Sun.Star Superbalita niingon nga gidawat nila ang desisyon sa kadagkuan.

"Wala man problema sa amo ang maong desisyon, pero mas pabor gyod para namo kung uyonan," matud sa duha.

Hinuon, andam sila sa paghulat sa desisyon kon ipahigayon man ang public hearing kalabot sa maong hangyo.

Kahinumduman nga ang kapunongan sa maong mga taxi driver nagpasabot ug nihangyo nga usbawan ang plite sa gihangyong oras tungod kay alkanse ang ilang pagbiyahe labina kon one-way lang ang ilang mga pasahero ug wala na silay makuha nga pasahero pagbalik. (SVB)