MGA tunghaan ang giingong target sa mga tigpayuhot og gidiling mga druga diin mga tinun-an sa sekondarya labina sa kolehiyo ang mahimong mga biktima, pamahayag sa opisyal sa kapolisan ug sa Philippine Drug Enforcement Agency (PDEA) 10.
 
Tungod niini gihingusgan sa PDEA sa pagpangulo ni Regional Director Gilbert Abanto Jr., ang walay hunong nga awareness campaign sa matag tunghaan kalabot sa epekto sa gidiling druga ngasdto sa mga biktima.
 "Instead na balewalain, pagandahin at magtutulungan nalang tayo para maging epektibo ang ating mga kampanya," pamahayag ni Abanto.
 
Gani, gipahinumdum sa maong opisyal ang mahitungod sa programang "Private Eye" diin hatagan og financial reward ang bisan kinsa nga makataho ngadto sa PDEA ingon man sa kapolisan mahitungod sa kalihokan sa gidiling druga nga magresulta sa pagkasikop sa mga responsabli.
 
Gipasabot ni Abanto nga dili angay mahadlok nga motaho ang bisan kinsa nga dunay nahibaw-an kalabot sa susamang kalihokan kay hatagan nila og igong seguridad ang nagtaho kay dili nila ibutyag ang identity niini.
 "In fact, marami na ang nabigyan ng reward pagkatapos nilang magbigay ng impormasiyon at nahuli ang drug pushers," dugang ni Abanto.
 
Subay niini, nagkadaiyang mga kalihokan ang gikatakdang ipahigayon sa adlawng Lunes alayon sa National Drug Prevention Week Celebration ug lakip niini ang symposium uban ang film showing diin ang mga partisipanti mao ang mga nagkadaiyang tunghaan, kabarangayan ug uban pa nga mga ahensiya sa gobiyerno.
 
Usa ka motorcade caravan ang gikatakdang himoon sa adlawng Lunes isip pagbukas sa maong programa diha sa Capitol Grounds.