Ang pamilya maoy labing gamay nga pudyot sa hut-ong sa komunidad apan maoy giisip nga labing importanti nga sukaranan alang sa malinawon, hapsay ug malipayon nga katilingban.

Kay diha sa pamilya, maumol ug magsukad ang maayo o daotang mithi, dependi unsang matang sa pagtulon-an nga idulot sa ginikanan sa ilang kabataan.

Sa laktod, ang malamposon nga katilingban magdependi sa kalig-on sa pamilya kay ang matag pangulo, opisyal o ordinaryong tawo maghupot sa mga pagtulon-an nga iyang nakuha diha sa ilang tagsatagsa ka pamilya.

Bag-o lang gipahibawo ang mananaog sa search alang sa "Huwarang Pamilyang Pilipino" nga gi organisar ug gipili sa Regional Inter-Agency Committee on the Filipino Family.

Ang pamilyang Glenn ug D’Vincet Quihoy uban sa ilang mga anak nga sila si GJ Joash, Clint John, Chris Angelico ug Jacks Zachariah maoy nag-una sa maong kontes.

Ang criteria sa maong indigay naglakip sa gugma ug respeto sa bana ug asawa, ang pagrespeto ug gugma usab sa magtiayon ngadto sa ilang mga anak, ug pagrespeto ug gugma sa matag usa.

Akong pasidungog alang sa pamilya Quihoy tungod sa maong dungog nga ilang nakuha.

Ang pamilyang Quihoy sa Buruun Iligan City maoy Regional Model Filipino Family for Northern Mindanao. Usa sa ilang tahas mao ang paghatod sa barangay action plan kabahin sa family intervention ug mga kalihukan alang sa pagpatunhay sa maayong mithi.

Maayo kining programaha nga gipasiugdahan sa DSWD-X isip kabahin sa ilang kasaulogan sa National Filipino Family Week uban sa tema nga "Si Nanay: Matatag sa Lahat ng Bagay."

Nganong gihisgutan nato kining pasidungog o kining programaha?

Dire sa akong gitrabahoan sa Saipan, sa Northern Marianas Island, usa sa labing dakong problema mao ang drugas, sugal ug pagpangawat.

Ang nakaparat sa maong problema kay kasagaran mga batan-on pa intawn ang mga nalambigit o mga suspetsado.

Ang pangutana kinsa man karon ang angay basolon - ang pamilya, eskwelahan, gobyerno, o ang simbahan.

Gitukod dire ang Neighborhood Watch Task Force nga langkoban sa mga molupyo sa usa ka village. Tumong niini mao ang pagtinabangay aron masumpo kining nagkadaiyang kriminalidad.

Alang kanako dili na unta kinahanglan ang task force, kon ang ginikanan matinumanon nga maggiya ug magmatuto sa ilang kabataan ngadto sa maayong dalan. Unta manakod kining pamilyang Quihoy sa atong katilingban.