BISAN sa paningkamot sa gobiyerno nga malimitahan gyud kining paglakwatsa sa mga estudyante daghan gihapong nagdula sa internet café panahon sa klase.

Wa magkuwang ang eskwelahan sa pagpahimangno sa ilang estudyante apan molighut gyud ang uban aron makadula.

Ang nakapait kay wala masayod ang mga ginikanan sa nahitabo sa ilang kabataan. Apan, dili kana maoy problema sa mga tunghaan. Kon imong subayon daghan sa kabataan karon ang dunay risk behavior. Ang ilang mga panglihoklihok nagpakita og makadaot sa ilang kaugalingon.

Nahinumdom ko sa survey nga gihimo sa mga tunghaan sa Saipan sa Northern Marianas Island. Nagpakita sa maong survey nga daghan sa kabataan dunay risk behavior. Sa interbyu nga gihimo miangkon ang mga bata nga dunay higayon nga makahunahuna sila sa pagpakamatay.

Daghan sab kanila nga miangkon nga kusog nga mogamit og sigarilyo ug ilimnon nga makahubog. Naa say mitug-an nga nakapangawat. Daghan sab miangkon nga naka-esperensya na og sex sa ilang linghod nga panuigon. Makalilisang!

Naalarma ang mga opisyal sa edukasyon busa gihingusgan nila nga butangan gyud og counselor ang matag tunghaan.

Ang ideal nga ratio mao nga sa matag 240 ka mga estudyanti kinahanglan dunay usa ka counselor. Ang counselor maoy motambag ug mogiya sa mga kabataan. Maoy kaduolan sa mga estudyanti kon duna silay problema.

Dinhi sa Cagayan de Oro, daghan kaayo kita og mga publikong tunghaan ug nagsubwak sab ang mga estudyanti, gani misobra na sa ideal nga ratio ang matag classroom.

Kumusta kaha ang sistema sa paggiya sa kabataan. Duna ba kitay guidance counselor nga ekperto sa pagpanambag. Wa ko mag-ingon nga dili maantigo ang atong magtutudlo motambag apan lahi kanang professional nga counselor kay suhito gyud sila nianang matang sa trabaho.

Abi mo importanti baya gyud unta kaayo ning counselor labi na sa atong tunghaan tungod sa kahimtang sa atong ekonomiya. Ang kalisod sa panginabuhi mao usahay hinungdan nga lisod magiyahan ang kabataan diha sa panimay. Ug ang kapobrehon pod usahay maoy magtulak sa kabataan paghimo og salawayon nga buhat. Unta tutokan kini sa Departamento sa Edukasyon. Butangan nila og guidance councelor, dili lang usa, apan basi sa gidaghanon sa mga estudyanti. Pero mura og imposibli kay kuwang man gani og magtutudlo.