Todino: Dili himoong barometro pagpili

Tuesday, February 2, 2010

Gawas ni kanhi Defense Secretary Gilbert Teodoro, ang laing pito ka mga presidentiables wa magpanagana pagbarog nga ilang ugkaton gyud ang mga anomaliya ni Presidenti Gloria Arroyo aron kon mapamatud-an mapahamtangan kini sa tukmang silot.

Mao ni ang ilang pasalig atubangan sa mga batan-on atol sa youth forum sa De La Salle University (DLSU)- Manila campus kon sila mapili nga sunod nga presidenti sa nasod.

Have something to report? Tell us in text, photos or videos.

Ningtambong sa maong forum mao sila si Teodoro, ang mga senador nga sila si Benigno Aquino III, Richard Gordon, Jamby Madrigal ug Manny Villar, ug sila si Olongapo Councilor JC de los Reyes, environmentalist Nicanor Perlas ug evangelist Eddie Villanueva.

Lihay kaayo ang tubag ni Teodoro sa pangutana: "Duna bay tulobagon si Presidenti Arroyo sa iyang pamunoan. Kon duna man, sa unsang matang nga siya dunay tulobagon?

Ang tubag ni Teodoro: "Kon moingon ko og oo, mahimo akong maakusahan nga misakay lamang sa sentimento sa kinabag-an batok sa kapartido ug kanhi pangulo sa iyang gabinite"- iyang gipasabot si Arroyo.

Atong timan-an kining pasalig sa mga kandidato kon tinud-on ba gyud nila nga gukdon si Presidenti Arroyo kay sa akong tan-aw wala man gani sila magkahiusa pagbabag sa kandidatora ni Arroyo.

Si Anakbayan party-list Rep. Risa Hontiveros ug si Elly Pamatong, abogado ug usa sa mga independent presidential candidates nga gi-disqualified sa Comelec, ang ningsang-at og petisyon nga magpugong ni Arroyo pagdagan sa distrito sa Pampanga pagka-kongresista.

Ang gibuhat nila ni Hontiveros ug Pamatong maoy unang lakang pagpaila nga seryoso sila pag-utingkay sa giingong kahiwian ni Arroyo kay kon modaog ang presidenti pagka-kongresista dako ang posibilidad nga makahimo pa kini pagpanalipod sa iyang kaugalingon pinaagi sa iyang padayong impluwensya sa Kongreso unya.

Kumusta man ang ubang mga presidentiables? Ila unang paaboton nga makalingkod sila sa Malacanang dayon himoon ang tanan aron mataral sa hukmanan si Arroyo.

Ang Liberal Party ni presidential candidate Benigno "Noynoy" Aquino III nagbutang og kandidato nga moparang ni Arroyo. Kon modaog man gani kini si Adonis Simpao sa iyang pakigharong ni Arroyo alang sa segundo distrito sa Pampanga, nan, mahimong mapiang ang gahom unya ni Arroyo apan dili hingpit.

Unta kining baroganan sa mga presidentiables paggukod ni Arroyo dili maoy himoong barometro sa mga botanti sa ilang pagpili og presidenti sa umaabot nga eleksiyon.