SALIKWAOT kaayo kining baruganan sa gobiyerno. Gusto nila iagi sa Department of Social Welfare and Development ang tanan donasyon nga used clothing gikan sa abroad.

Konpiskahon sa Bureau of Custom kon dili i-address sa DSWD kay kuno nasupak kini sa Republic Act 4653 nga gipatuman sukad pa niadtong 1966.

Ang maong balaod nag-ingon alang kini sa proteksyon sa panglawas sa katawhan ug pagpanalipod sa dignidad sa mga Filipino. Pero, sukad niadtong 1966, pila na kaha ka sakong okay-okay nga gipalusot sa atong gobiyerno.

Nganong karon pa man sila mohingusog pagpatuman aning balaora. Gumikan niini, gatosan sa mga package sa used clothing alang sa mga biktima sa bagyong Ondoy ug Pepeng nangatanggong.

Ang LBC Mahubay sa Saipan gitugotan sa main office sa San Francisco nga mohatag og libreng shipment sa tanang donasyon alang sa Pilipinas.

Atong taga-lungsod nga si Olive Yana, presidenti karon sa Overseas Filipino Oganization sa Saipan, usa sa nagpasiugdan og relief goods ug fundraising campaign.

Dul-an sa 30 ka LBC boxes ang natigum sa grupo ni Yana. Napadala na ang 22 ka kahon ug duna pay nahibilin. Gipaundang sa LBC Saipan ang pagpadala human nila madawat ang direktiba sa San Francisco office tungod sa Republic Act 4653. Ang address man gud nga gibutang ni Yana mao ang Sagip Kapamilya sa ABS-CBN, dili DSWD.

Gawas ni Yana , dunay grupo usab sa United Workers Movement ug Pilipino Contract Workers Association, nangolekta pod og hinabang pero wala gi-address sa DSWD. Maayo nalang mipagawas diay og executive order si Presidenti Arroyo nga magtugot sa pagpadala og used clothing, apan kinahanglan i-address sa DSWD.

Kuwang gyud og koordinasyon ang gobyerno. Ang Malacanang ug ang DSWD ug ang Bureau of Custom wa magkasinabot. Ang usa ka ahensya nagdili apan ang Malacanang nagtugot.

Panahon sa kalamidad klarohon unta sa gobyerno ilang papel.

Naka-bulls eye si Presidenti Arroyo sa iyang pagtukod og task force nga maoy motutok sa problema panahon sa kalamidad. Pinaagi unya niini dili na magkayamokat kon unsang ahensiya sa gobiyerno moatubang sa problema.

Pero, kinahanglan una nila bangonon pagbalik kining dungog sa DSWD. Kahibaw ba mo nganong mas gusto ang mga OFW ipadala ilang hinabang direkta ngadto sa mga pribadong foundation. Dili ba kaha tungod kay kon DSWD ang modawat, katunga nalang ang moabot ngadto sa mga recipient.